Преподобная Параскева Топловская, игумения Топловского Свято-Троице Параскевиевского женского монастыря, управляла обителью с 1889 по 1928 годы. За труды на пользу монастыря была удостоена самой высокой награды, какую только могут иметь монашествующие женщины — наперсного креста.
Святая преподобная Параскева Топловская, в миру Ольга Ивановна Родимцева, родилась в Москве в 1849 году, по своему социальному положению была мещанкой. В 22 года Ольга поступила в Московский Страстной монастырь.
В 1874 году она была облечена в рясофор с именем Вячеслава. Когда игумения Страстного монастыря Валерия в 1875 году перешла в Топловский монастырь, за ней последовала и Вячеслава. Но после ухода Валерии из Топловской обители, Вячеслава осталась.
Здесь она прожила до конца своих дней. Вскоре за свое прилежание послушница Вячеслава была выбрана секретарем монастырского совета, затем казначеей. В 1884 году Святейший Синод почтил ее грамотой за добросовестную службу.
16 июня 1889 года владыка Мартиниан постриг Вячеславу в монашество с наречением имени Параскевы. В декабре этого же года она была назначена настоятельницей Топловского монастыря.
26 июля 1890 года, в день памяти преподобномученицы Параскевы, своей небесной покровительницы, матушка была возведена в сан игумении, в 1894 году преподобная Параскева Топловская получила свою высокую награду — наперсный крест.
Преподобная Параскева Топловская несла тяготы управления обителью 39 лет, переживая с ней взлеты и падения. При матушке Параскеве монастырская жизнь достигла наивысшего расцвета и духовного подъема.
И, когда в годы советской власти началось закрытие храмов и монастырей, разорение и поругание их, преподобная Параскева Топловская очень тяжело переживала, видя, как гибнет созданная ею обитель. Проболела матушка всего 1,5 часа, успев исповедоваться и причаститься.
Ее сердце остановилось 16 декабря 1928 года от паралича. Преподобная Параскева Топловская скончалась через три месяца после окончательного закрытия монастыря. Сердце ее не выдержало всех надругательств над святынями, над верой.
25 марта 2009 года в предстоятельской резиденции Киево-Печерской Лавры состоялось очередное заседание Священного Синода Украинской Православной Церкви под председательством Блаженнейшего Митрополита Владимира.
Рассмотрев житие, труды, подвиги, чудеса и учтя народное почитание подвижницы благочестия игумении Параскевы, Священный Синод принял решение благословить для местного прославления игумению Параскеву с утверждением ее иконописного изображения и тропаря и кондака.
30 июля 2009 года состоялось обретение мощей преподобной Параскевы Топловской, а 10 июля 2010 года состоялось прославление святой преподобной Параскевы.
На месте ее упокоения сооружена часовня, которую непременно стараются посетить все приезжающие в Топловский монастырь. На этом месте и в наши дни происходят чудеса, о которых рассказывают паломники.
Память: 3 / 16 декабря.
Акафист святой преподобной Параскеве игумении Топловской
(память 16 декабря по нов.ст.).
Кондак 1
Избранной невесте Христовой,/ скорой помощнице просящим помощи твоея,/ в крепости духовней житие скончавшей/ и веру в чистоте соблюдшей/ воспеваем ти умиленное сие пение:
Радуйся, преподобная мати Параскево Топловская, молитвеннице усердная о душах наших.
Икос 1
Ангелов лики удивила еси Параскево преподобная, егда издетска ум зрелый показала и возымела еси благое желание Господу Единому работати и служити, сего ради дом родительский оставила и во обитель Страстем Христовым посвященную вселилася еси. Тем же зряще твое богоугодное житие, со благоговением и радостию глаголем ти:
Радуйся, благочестивая отрасль родителей твоих, Богом избранная;
Радуйся, во Святем Православии строго воспитанная;
Радуйся, от младенства Богослужение церковное возлюбившая;
Радуйся, на служение Господу Иисусу Христу от юности себе посвятившая;
Радуйся, Священным Писанием сердце и ум свои напоившая;
Радуйся, в житии твоем Евангельския заповеди исполнившая;
Радуйся, скорогибнущих благ мира сего отвергшаяся;
Радуйся, в ризу многоценную нищеты Христовой облекшаяся;
Радуйся, миро добродетелей твоих Христу принесшая;
Радуйся, слезами покаяния нозе Его омывшая;
Радуйся, яко явилася еси подобница и последовательница жен святых;
Радуйся, стяжавшая веру и дерзновение за Христом шедших;
Радуйся, преподобная мати Параскево Топловская, молитвеннице усердная о душах наших.
Кондак 2
Видящее, яко красная мира сего ничто же есть, измлада до последних твоих непрестанно помышляла еси о Небеснем, избрав многотрудное и скорбное монашеское житие, многим пощением, бдением и коленопреклонением предавалася еси стяжавши неувядаемый славы венец. Ради таковых и иных мнозих подвигов твоих вопием почивающему во святых Своих Богу: Аллилуиа.
Икос 2
Разум Христов и страх Божий стяжавшая, во Страстной обители града Москвы неленостно потрудилася еси, в меру возраста Христова прийти хотящи, вся Богу прилежащи, мраз зимний претерпела еси и летний носила вар, была еси дом Премудрости Божественныя, сего ради во умилении глаголем:
Радуйся, Господа всем сердцем возлюбившая;
Радуйся, житием своим чистым Ему угодившая;
Радуйся, вслед преподобней Марии всеусердно потекшая;
Радуйся, Египта страстей избегшая;
Радуйся, фараона мысленного духовным мечем победившая;
Радуйся, в Чермнем мори слез твоих, множество страстей, аки фараониты, потопившая;
Радуйся, Крестом Христовым, аки жезлом Моисейским, полчища демонския посекшая;
Радуйся, в жертву непорочную Небесному Жениху себе принесшая;
Радуйся, агнице пречестная Агнцу Небесному угодившая;
Радуйся, душу свою постом и молитвою освятившая;
Радуйся, иноческому послушанию всецело предавшаяся;
Радуйся, добродетели терпения и кротости стяжавшая;
Радуйся, преподобная мати Параскево Топловская, молитвеннице усердная о душах наших.
Кондак 3
От первопрестольного града изшедши, пресельница была еси урочищу Топлы, идеже обрела еси духовную наставницу пустынножительницу Константину, от рода болгарского, к монашескому житию гласом Божиим призванную, от нея же и деланию умному научилася еси, непрестанно воспевающи: Аллилуиа.
Икос 3
Сила Вышняго укрепи дух твой, егда ты, дивная мати наша, во мнозех подвизех славно просияла еси, духовную премудрость явивши ближним твоим. Темже ныне едиными усты и единым сердцем, поем ти:
Радуйся, Краснейшего, паче всех красот мира сего, возлюбившая;
Радуйся, яко зрением премудрости Божией в творении Его, к славословию Творца возшедшая;
Радуйся, суеты мирския бегая, блаженный плач о гресех обретшая;
Радуйся, в тяготе вещей земных, тяготу гибельную уразумевшая;
Радуйся, смиренное и ангелонравное житие премудро стяжавшая;
Радуйся, яко обличительница осуждения и многословия явилася еси нам;
Радуйся, Боговиднейшия изображения в сердце своем написавши добродетелей виды стяжала еси;
Радуйся, свирепство страстей постническим жительством пресекла еси;
Радуйся, отречения своея воли премудрое наставление;
Радуйся, душевныя и телесныя чистоты непрестанное сияние;
Радуйся, яко тя, крепкую подвижницу, огнь страстей не опали;
Радуйся, роса Божественнаго Духа тя ороси;
Радуйся, преподобная мати Параскево Топловская, молитвеннице усердная о душах наших.
Кондак 4
Болезньми и поты твоими возделавши воздержания землю и сеявши в сердцы пшеницу Духа, класс безстрастия принесла еси, Парскево блаженная, благочестно во иночестем чине велии труды подъяла еси и неленостно, вся послушания проходящи, воистину преподобническое житие сотворила еси, непрестанно поющи Христу Богу: Аллилуиа.
Икос 4
Страстей свирепство ангелонравным житием угасила еси истончавающи тело воздержанием, ангелоподобная Параскево, дивная мати наша, плотская стремления иждивши в сердце своем, жилище Святаго Духа соделалася еси, сего ради епископ Таврический Мартиниан малые схимы тя сподоби и нарече ти имя святаго Пятка, назнаменуя твое многотрудное и страдальческое житие, его же ради вопием ти:
Радуйся, образом молитвы непрестанныя всем сестрам бывшая;
Радуйся, жилище Святые Троицы соделавшаяся;
Радуйся, крест игуменства со смирением от Господа приемшая;
Радуйся, во Отечестве Небеснем быти присно желавшая;
Радуйся, древо благосеннолиственное, Бога умолившее шумом молитвенных листвий своих о чадех духовных;
Радуйся, яко крепость и исцеления приемлют именем твоим немощствующие плотию;
Радуйся, яко скорбни духом и печальны обретают в тебе утешение;
Радуйся, Горняго Иерусалима обитательнице блаженная;
Радуйся, мати богомудрая, инокинь множество собравшая;
Радуйся, подражати житию древних отец наставлявшая;
Радуйся, славы текущия и тленныя возгнушавшаяся;
Радуйся, славу и жизнь истинную наследовавшая;
Радуйся, преподобная мати Параскево Топловская, молитвеннице усердная о душах наших.
Кондак 5
Боготечная звезда явилася еси, всечестная Параскево, душевная бо явления и страсти плотския мечем воздержания посекла еси, мысленныя же согрешения молчанием поста умертвила еси, струями слез твоих сердечною пустыню напоила еси и прозябла еси нам плодом покаяния, непрестанно поющим Богу: Аллилуиа.
Икос 5
Образом и правилом пречестным инокиням, сиротам же мати, питательница вдовицам и девам наставница богомудрая была еси, Параскево блаженная, скорбной и тесной шествовати стезею сподобилася еси. Яве красотою добродетелей уяснивши душу, Небесной достигла еси жизни нескончаемой, идеже Свет Безконечный есть Христос. Сего ради мы, чада твоя, вопием ти:
Радуйся, много имущая к Богу и Его Пречистей Матери дерзновение;
Радуйся, градов наших и обители твоея преславное утверждение;
Радуйся, житием своим чистым заповеди Божия исполняти сестер подвигшая;
Радуйся, награду от Господа получившая;
Радуйся, сестрам обители твоея присное научение;
Радуйся, предивное монашескаго подвига совершение;
Радуйся, Господеви угождающая, от Него же помощь на благия дела получившая;
Радуйся, житием своим Богу и Пресвятей Деве верно поработавшая;
Радуйся, обетом целомудрия чистоту сердца твоего явившая;
Радуйся, обетом нестяжания высоту духа твоего показавшая;
Радуйся, обетом послушания Богу и ближним послужившая;
Радуйся, и о нас, грешных, молитвы к Нему возсылающая;
Радуйся, преподобная мати Параскево Топловская, молитвеннице усердная о душах наших.
Кондак 6
На образ купины неопалимыя умно взирая, чудоточную икону Казанскую яве узрела еси изливающую токи чудес и исцелений всем с верою к ней притекающим, сего ради образ сей во святей обители твоей поставила еси и воспевала благохвалебную песнь Святей Троице: Аллилуиа.
Икос 6
Взыграния вся плотская обуздавшая болезньми постническими, дивною показала еси души твоея мудрость, миру сему распялася еси, по заповеди, и к ревности жития непорочного усердно воздвигла еси себе, сего ради тя усердно почитаем сими похвальными словесы:
Радуйся, истинная Евангелия Христова последовательнице;
Радуйся, достойная Царствия Небесного наследнице;
Радуйся, благодатию Божиею паче, нежели хлебом земным, насыщенная;
Радуйся, от источника приснотекущего – Евангельскаго Благовестия напоенная;
Радуйся, яже тело изнуривши, на страсти вельми подвизалася еси;
Радуйся, инокинь похвало и сонма постническаго радование;
Радуйся, лика девственников преславное украшение;
Радуйся, агнице незлобивая злобу волка мысленнаго победившая;
Радуйся, агнице непорочная вся коварства зверя лютаго силою креста разрушившая;
Радуйся, вся плотская мудрования увядившая;
Радуйся, духовным трезвением и бореньми с помыслы демонскую тьму отгнавшая;
Радуйся, Светом Трисолнечного Божества вся немощная дерзости их поправшая;
Радуйся, преподобная мати Параскево Топловская, молитвеннице усердная о душах наших.
Кондак 7
Не на песце суеты мирския, но на камени веры основание положивши, Параскево блаженная, во славу Святыя Троицы церковь во обители твоей создавши, сестры и дщери твоя духовныя научала еси неустанно пети Богу: Аллилуиа.
Икос 7
Удалилася еси, сущих в мире сем и сладких всех и приятилище соделалася еси Духа Святаго, темже явила еси нам покаяния целитву и слез умиленных врачевание, показала еси и стезю паки ведущую к жизни негиблющей, тем же ныне прими благохваления сия:
Радуйся, образ монашеского жития всем сущим с тобою преподавшая;
Радуйся, крепкою молитвою стрелы сатанины от обители твоея отгнавшая;
Радуйся, душ боголюбивых мудрая наставнице;
Радуйся, болезней телесных и душевных о Христе наша целительнице;
Радуйся, плоть истончившая постническими труды, воздержание стяжавшая;
Радуйся, соблазны мира сего от сестер отгнавшая;
Радуйся, Пресвятыя Троицы избранное жилище;
Радуйся, даров Духа Святаго пречестное вместилище;
Радуйся, яко очеса твоя соделала еси источники слез;
Радуйся, словесы Божественных Писаний исполненная;
Радуйся, яко от тебе целительную благодать почерпаем;
Радуйся, яко молитвенным ходатайством твоим ко Святей Троице прегрешений оставление приемлем;
Радуйся, преподобная мати Параскево Топловская, молитвеннице усердная о душах наших.
Кондак 8
Прославляя избранная Своя, Бог прослави тя, преподобная Параскево. Яко светило многосветлое показа тя, егда Отечество твое тма нечестия безбожнаго покры. Велием гласом, призывала еси не страшиться гонения лютаго и глаголала «вся могу о укрепляющем мя Иисусе»: Аллилуиа.
Икос 8
Далече изыде святаго имене твоего слава, богоблаженная мати, явилася бо еси истинная ревнительнице веры Православныя и преподобная жена, всем сердцем благоугодити Богу поревновавшая. Поминая убо подвиги славнаго исповедническаго и преподобническаго жития твоего вопием ти сице:
Радуйся, яко злобы безбожных не устрашилася еси;
Радуйся, яко высотою смирения пресветла явилася еси;
Радуйся, умным зрением Креста Христова и Страстей Его укрепляемая;
Радуйся, в болезнех и скорбех Богоматерию утешаемая;
Радуйся, кротостию и смирением гордыню нечестивых посрамившая;
Радуйся, яко обильным подаянием алчущия удовлившая;
Радуйся, светило Богосветлое на тверди церкве сияющее;
Радуйся, светом Богоразумия сердца наша непрестанно просвещающая;
Радуйся, от печалей и скорбей чтущих тя сохраняющая;
Радуйся, от напастей бесовских защищающая;
Радуйся, поборницей святотеческаго благочестия пребывшая;
Радуйся, твердой защитницей правоверия себе явившая;
Радуйся, преподобная мати Параскево Топловская, молитвеннице усердная о душах наших.
Кондак 9
Дерзновенно себе в руце Божии предав, смиренно пред безбожными предстала еси, разорити обитель хотящими, и безбоязненно обличала еси безумных, Господеви вопия: Аллилуиа.
Икос 9
Множество скорбей чрез сердце твое проидоша, егда узрела еси Церкве Святыя разорение и верных чад Ея жестокое избиение. Ты же, укрепляема Духом Божиим, взывала еси: «Претерпевый же до конца, той спасен будет». Сего ради мы, внимая евангельскому учению сему, умиленную песнь приносим ти:
Радуйся, отрадо скорбящих и печальных утешение;
Радуйся, радости в терпении страданий Господа ради, обретение;
Радуйся, древлим мученицем и исповедницем уподобившаяся;
Радуйся, яко «не должно нам сходити со Креста», рекшая;
Радуйся, зло любовию славно побеждавшая;
Радуйся, яко и ныне словесных овец Христовых мудре в страданиих укрепляющая;
Радуйся, мнози сестры своя к исповедничеству приведшая;
Радуйся, яко духовная сподвижницы твоя в гонениих Веру Православную непоколебиму соблюдоша;
Радуйся, яко твоими молитвами мнози насельницы Топловския обители достойно венцы нетленныя от Господа прияша;
Радуйся, яже имена сомолитвенниц и спостниц твоих ведомы Единому Богу суть;
Радуйся, в житии твоем Христа ради многоскорбна пребыла еси;
Радуйся, в бедах и трудных обстояниих помощнице наша скорая;
Радуйся, преподобная мати Параскево Топловская, молитвеннице усердная о душах наших.
Кондак 10
Глас спасительный Пастыря твоего услышала еси: «Аще кто хощет по Мне идти да отвержется себе, возьмет крест свой и по Мне грядет» ты же, в багряницу спасительную страданий облеклася еси и вино поругания испив, Жизнодавцу Христу воспела еси дивную песнь: Аллилуиа.
Икос 10
«Слава долготерпению Твоему, Господи!» взывала еси непрестанно, видящи разорение обители твоея и храмов созданных тобою во славу Владыки Христа, в скорбех сих и искушениих, терпение Иовлево стяжала еси, Параскево многострадальная, но, аки сребро и злато седмирицею очищены, тако содела Господь и душу твою. Мы же твоим заступлением ограждаеми, зовем ти:
Радуйся, любовию и молитвами заблудших к Богу обращаеши;
Радуйся, яко из рова греховнаго мнози спасаеши;
Радуйся, Римстей Параскеве тезоименитая;
Радуйся, житию ея усердно поревновавшая;
Радуйся, в терпении Иову Многострадальному уподобившаяся;
Радуйся, в испытаниих адаманта твердейши показалася еси;
Радуйся, и нас, немощных, Господа непоколеблемо исповедати научила еси;
Радуйся, в страданиих душу свою очистила еси;
Радуйся, к нетленней жизни ю уготовала еси;
Радуйся, во еже жити в братолюбии нас наставляеши;
Радуйся, странноприимства никогдаже оставляти завещаеши;
Радуйся, всех просящих помощи николиже отвергаеши;
Радуйся, преподобная мати Параскево Топловская, молитвеннице усердная о душах наших.
Кондак 11
Просвещена добротою постническою и одеяна ризою нетления, Параскево богомудрая, по блаженном успении твоем, венцем даров украшенная с лики преподобническими ныне Владыце всех предстоиши радующися и поющи Ему: Аллилуиа.
Икос 11
Постом украсившаяся и чистотою душевною, аки лучи пресветлыми, просвещаеши верныя, Параскево блаженная, тем твою светоносную совершающее память, благочестно тебе вопием:
Радуйся, со усердием во всех делех своих волю Господню исполнившая;
Радуйся, яко Самаряныня источник неистощаемый воды живыя – Христа обретшая;
Радуйся, дом милосердия для болящих и немощных устроившая;
Радуйся, любовию своею к ближним нас утешающая;
Радуйся, вторая Хананея Господа о чадех твоих от суда на милость преклонившая;
Радуйся, яко евангельская вдовица лептою, от скудости иноческаго жития своего, обитель Святыя Троицы зело украсившая;
Радуйся, в мысленную пустыню вселившися страстей образы благочестно истребила еси;
Радуйся, истинная раба Божия, сотворшая волю Господина своего;
Радуйся, течение монашескаго жития благочестно скончавшая;
Радуйся, смерть вкусивши в жизнь вечную невозбранно вшедшая;
Радуйся, о земнем Отечестве нашем неусыпная молитвеннице;
Радуйся, ликов монашествующих тесным путем премудрая водительнице.
Радуйся, преподобная мати Параскево Топловская, молитвеннице усердная о душах наших.
Кондак 12
Ныне нетленных даров наслаждающаяся и трисолнечного света исполняющая певцы твоя преподобная Параскево, болезней, страстей и бед избави, молитвами твоими, да достойно Христу воспоим: Аллилуиа.
Икос 12
Во обители присноживующия вселилася еси, богомудрая, идеже ликуют апостолов собор и множества мученическая, преподобных собрания и пророческие лики, воздаяния болезней от Бога приемлеши достославная, на земли же от мощей твоих чудеса мнози содеваются и река исцелений источается всем поющим ти таковая:
Радуйся, яко честныя мощи твоя утверждают нас в вере и благочестии;
Радуйся, яко молящиися тебе избавляются от всякаго нечестия;
Радуйся, яко и ныне обитель Топловская молитвами твоими украшается;
Радуйся, явлении и чудесы твоими сердца верных просвещаются;
Радуйся, безчадных родителей о чадех Божественная радосте;
Радуйся, всех во вражде сущих скорое примирение;
Радуйся, теплая предстательнице наша пред Богом;
Радуйся, яко чистоты рачительница велия показалася еси нам;
Радуйся, яко людие православнии прославляху о тебе Христа Бога нашего;
Радуйся, яко ты явилася еси велия слава наша и похвало;
Радуйся, инокиням, зде подвизающимся, верная покровительнице;
Радуйся, о всех с верою к тебе притекающих неустанная попечительнице;
Радуйся, преподобная мати Параскево Топловская, молитвеннице усердная о душах наших.
Кондак 13
О, преподобная мати Параскево, прими сие благодарственное пение и о прощении грехов наших Милосерднаго Господа умоли, да вопием купно с тобою Ему: Аллилуиа.
Этот Кондак читается трижды, затем 1-й Икос и Кондак 1-й
Молитва преподобной Параскеве Топловской
О, преподобная и мудрая мати наша Параскево! В жизни сей, временней, непрестанно Христу работати навыкшая, в послушании, посте и молитве присно пребывшая, благочестно житие твое скончавшая и стяжавшая неувядаемый славы венец!
Прими сие моление наше малое с любовию и слезами тебе приносимое. Просвети тьму нашу лучами пресветлыми божественных добродетелей твоих. Излей на нас, чад твоих, елей милостей и благодеяний твоих. Струпы греховныя умягчи, раны душевныя и телесныя исцели, в немощех сущия посети и утеши.
О, блаженная и кроткая мати наша, не остави нас сирых! И якоже не оставила еси обители твоея по успении твоем, пребывая тамо телом, душею же на небесех, тако и ныне не остави нас в добродетели убогих. Избави нас всемощным твоим, еже к Богу, предстательством от бед и искушений, находящих на ны по грехом нашим. Умоли Человеколюбца Христа даровати нам оставление грехов, да невозбранно пройдем поприще временнаго жития сего и внидем в радость вечную со всеми святыми. Аминь.
Тропарь, глас 1
От юности твоея уневестилася еси Христу и Тому Единому работала еси, Параскево богомудрая. Егда богоспасаемую обитель твою хищныя богоборцы обложиша, подвигом исповедничества увенчалася еси. Темже и нас в добродетелех с любовию вразуми твердо стояти в православной вере и благочестии.
Кондак, глас 2
Во обители Топловстей вселилася еси, Параскево блаженная, мирский мятеж и человеческое лукавство презрела еси. Темже и Бог превознесе тя во времена лютых гонений. Укрепи малодушныя и загради уста хулящих Святую Церковь, от всяких находящих зол избави нас молитвами твоими со умилением зовущих: Радуйся, похвало земли нашея и утверждение.
Величание
Ублажаем тя, преподобная мати наша Параскево, и чтим святую память твою, наставнице монахинь и собеседнице Ангелов.
Составитель акафиста иерей Василий Печевистый
