Конда́к 1.
Избра́нный святи́телю Це́ркве Правосла́вныя и испове́дниче, возсия́вый стране́ на́шей, я́ко светоза́рное свети́ло, до́бре потруди́выйся и за и́мя Христо́во гоне́ние претерпе́вый, прославля́юще просла́вльшаго тя́ Го́спода, дарова́вшаго на́м тебе́ но́ваго моли́твенника и помо́щника, похва́льное воспева́ем ти́ пе́ние; ты́ же, я́ко име́яй ве́лие дерзнове́ние ко Влады́це Небесе́ и земли́, от вся́ких неду́гов душе́вных и теле́сных свободи́ на́с и до́бре стоя́ти во Правосла́вии укрепи́, да вси́ во умиле́нии зове́м ти́: Ра́дуйся, святи́телю и испове́дниче Луко́, врачу́ благи́й и ми́лостивый.
И́кос 1.
А́нгелов собесе́дниче и челове́ков наста́вниче, Луко́ пресла́вный, подо́бне евангели́сту и апо́столу Луце́, ему́же тезоимени́т сы́й, от Бо́га да́р цели́ти неду́ги челове́ческия прия́л еси́, мно́гия труды́ подъе́мля во врачева́нии боле́зней бли́жних, пло́ть нося́, о пло́ти не раде́л еси́, де́лы же до́брыми Отца́ Небе́снаго просла́вил еси́. Те́мже благода́рне во умиле́нии зове́м ти́:
Ра́дуйся, от ю́ности ра́зум сво́й и́гу Христо́ву покори́вый; ра́дуйся, пречестно́е Святы́я Тро́ицы селе́ние бы́вый.
Ра́дуйся, блаже́нство ми́лостивых, по сло́ву Го́спода, унасле́довавый; ра́дуйся, ве́рою Христо́вою и зна́нием богодарова́нным мно́гия неду́жныя исцели́вый.
Ра́дуйся, стра́ждущих неду́ги теле́сными врачу́ милосе́рдый; ра́дуйся, во дни́ бра́ни вожде́й и во́инов цели́телю иску́сный.
Ра́дуйся, все́х враче́в наста́вниче; ра́дуйся, ско́рый в ну́ждах и ско́рбех су́щим помо́щниче.
Ра́дуйся, Це́ркве Правосла́вныя утвержде́ние; ра́дуйся, земли́ на́шея озаре́ние.
Ра́дуйся, кры́мския па́ствы похвале́ние; ра́дуйся, гра́да Симферо́поля украше́ние.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 2.
Ви́дя в челове́цех во вре́мя врачева́ний, а́ки в зерца́ле, прему́дрость и сла́ву Творца́ вся́ческих Бо́га, к Нему́ ду́хом всегда́ возноси́лся еси́, богому́дре; све́том же богоразу́мия твоего́ и на́с озари́, да вопие́м ку́пно с тобо́ю: Аллилу́ия.
И́кос 2.
Ра́зум тво́й Боже́ственными уче́ньми просвети́л еси́, Луко́ всесла́вне, отве́ргнув вся́кое плотско́е мудрова́ние, с ра́зумом же и во́лю повину́л еси́ Го́сподеви, подо́бен апо́столом бы́в. Ти́и бо, по сло́ву Христо́ву: гряди́те по Мне́, и сотворю́ вы́ ловцы́ челове́ком, оста́виша вся́ и по Не́м идо́ша, и ты́, свя́те, услы́шав Го́спода Иису́са, зову́щаго тя́ на служе́ние, прие́млеши свяще́нство в Це́ркви Правосла́вней. Сего́ ра́ди, я́ко богому́драго наста́вника тя́ ублажа́юще, воспева́ем си́це:
Ра́дуйся, о души́ при́сное попече́ние показа́вый; ра́дуйся, А́нгела храни́теля твоего́ возвесели́вый.
Ра́дуйся, во уче́нии преспева́вый и мудрецы́ ми́ра сего́ удиви́вый; ра́дуйся, от творя́щих беззако́ние стопы́ твоя́ уклони́вый.
Ра́дуйся, Бо́жия Прему́дрости пропове́дниче и созерца́телю; ра́дуйся, и́стиннаго богосло́вия златослове́сный учи́телю.
Ра́дуйся, апо́стольских преда́ний блюсти́телю; ра́дуйся, Правосла́вия ревни́телю.
Ра́дуйся, звездо́, пу́ть ко спасе́нию показу́ющая; ра́дуйся, свеще́, Бо́гом возжже́нная, мра́к нече́стия разгоня́ющая.
Ра́дуйся, раско́льников обличи́вый; ра́дуйся, свиде́ний и оправда́ний Госпо́дних возжада́вый.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 3.
Си́лою благода́ти Бо́жия, еще́ во вре́менней жи́зни прия́л еси́ да́р, свя́те Луко́, неду́ги цели́ти, да вси́ усе́рдно притека́ющии к тебе́ исцеле́ния боле́зней теле́сных и наипа́че душе́вных сподобля́ются, вопию́ще Бо́гу: Аллилу́ия.
И́кос 3.
Име́я неусы́пное попече́ние о спасе́нии ду́ш, вве́ренных тебе́ от Бо́га, Луко́ блаже́нне, па́стырски к душеспаси́тельной жи́зни и сло́вом, и са́мым де́лом непреста́нно и́х наставля́л еси́. Сего́ ра́ди приими́ от на́шего усе́рдия похвалы́, досто́йно тебе́ приноси́мыя:
Ра́дуйся, ра́зума Боже́ственнаго испо́лненный; ра́дуйся, благода́тию Ду́ха Свята́го приосене́нный.
Ра́дуйся, нището́ю Христо́вою обогати́выйся; ра́дуйся, щи́те, защища́яй благоче́стие.
Ра́дуйся, па́стырю до́брый, блужда́ющих по гора́м суему́дрия взыска́вый; ра́дуйся, де́лателю виногра́да Христо́ва, ча́д Бо́жиих в ве́ре укрепля́яй.
Ра́дуйся, непоколеби́мый Правосла́вия сто́лпе; ра́дуйся, тве́рдый ка́меню ве́ры.
Ра́дуйся, душепа́губнаго неве́рия и обновле́нческаго раско́ла обличи́телю; ра́дуйся, в де́лании духо́внем подвиза́ющихся му́дрый укрепи́телю.
Ра́дуйся, от ми́ра гони́мым приста́нище ти́хое указу́яй; ра́дуйся, я́ко прии́м кре́ст, Христу́ после́довал еси́.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 4.
Бу́рю вну́трь име́я помышле́ний мно́гих, недоумева́ше ра́б Бо́жий, что́ рече́т о не́м Госпо́дь, егда́ проразумева́ху его́ досто́йна бы́ти епи́скопом гра́ду Ташке́нту, оба́че всего́ себе́ Христу́ Бо́гу преда́в, Тому́ о все́м благодаре́ние возсыла́ше, зовы́й: благослове́н Бо́г, излива́яй благода́ть Свою́ на архиере́и Своя́, и поя́ Ему́: Аллилу́ия.
И́кос 4.
Слы́шавше лю́дие правосла́внии, в гоне́нии су́щии, о благопло́дных добро́тах души́ твоея́, богоно́се Луко́, и ви́девше тя́ на степе́ни святи́тельства, я́ко досто́йный сосу́д Боже́ственныя благода́ти, вся́ немощна́я врачу́ющия и оскудева́ющая восполня́ющия, дивля́хуся чу́дному промышле́нию Бо́жию о тебе́ и приноша́ху ти́ благохвале́ния сицева́я:
Ра́дуйся, архиере́ю, от Самаго́ Го́спода пронарече́нный; ра́дуйся, о надписа́нии са́на епи́скопскаго на кни́зе твое́й предуказа́ние мы́сленное прие́мый.
Ра́дуйся, иера́рхов изря́дное украше́ние; ра́дуйся, па́стырю, ду́шу за о́вцы Христо́вы положи́ти гото́вый.
Ра́дуйся, многосве́тлый Це́ркве свети́льниче; ра́дуйся, апо́столов соприча́стниче.
Ра́дуйся, испове́дников удобре́ние; ра́дуйся, вся́кое о себе́ отве́ргнувый попече́ние.
Ра́дуйся, скорбе́й утоли́телю; ра́дуйся, о людски́х неве́жествиих печа́льниче.
Ра́дуйся, иска́вших спасе́ния пра́вым уче́нием оглаша́вый; ра́дуйся, житие́м твои́м сего́ уче́ния не посрами́вый.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 5.
Богото́чною Кро́вию Христо́вою от ве́чныя сме́рти искупле́нныя жела́я соблюсти́, во дни́ стра́шных гоне́ний са́н епи́скопский от ру́к архиере́ев правосла́вных прия́л еси́, святи́телю Луко́, и де́ло благове́стника до́бре сотвори́л еси́, облича́я, запреща́я, умоля́я со вся́ким долготерпе́нием и уче́нием и поя́ Бо́гу: Аллилу́ия.
И́кос 5.
Ви́девше А́нгельстии чи́нове вели́кия по́двиги твоя́, удиви́шася, егда́ по за́поведи Госпо́дней: блаже́ни изгна́ни пра́вды ра́ди, я́ко те́х е́сть Ца́рствие Небе́сное, в кре́пости серде́чней безро́потно поне́сл еси́ заточе́ние и изгна́ние за и́мя Го́спода и Святу́ю Це́рковь Христо́ву, терпе́нием ве́лиим устроя́я спасе́ние свое́, приме́ром же свои́м ве́рных ду́ши назида́я. Мы́ же тя́, усе́рдно любо́вию почита́юще, честву́ем похвала́ми си́ми:
Ра́дуйся, свети́льниче, на све́щнице церко́внем поста́вленный; ра́дуйся, подви́жниче, о́браз любве́ долготерпя́щия яви́вый.
Ра́дуйся, защища́ти тя́ ве́рным воспрети́вый; ра́дуйся, в ру́ки мучи́телей за ве́ру смире́нно но́щию преда́выйся.
Ра́дуйся, посо́бниками непра́ведных суде́й уничиже́нный; ра́дуйся, в заточе́ние со смире́нием безро́потно ше́дый.
Ра́дуйся, пра́вды ра́ди с па́ствою твое́ю ташке́нтскою разлуче́ние претерпе́вый; ра́дуйся, я́ко ве́рнии о разлуче́нии с тобо́ю рыда́ху.
Ра́дуйся, за Го́спода распя́таго изъязвле́нный и зауше́нный; ра́дуйся, лжи́вая уста́ безбо́жных загради́вый.
Ра́дуйся, пра́ведными усты́ твои́ми Небе́сныя и́стины и во изгна́нии веща́вый; ра́дуйся, я́ко му́ченицы на Небесе́х о терпе́нии твое́м ликовствова́ху.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 6.
Пропове́дник немо́лчный та́йны Пресвяты́я, Единосу́щныя и Неразде́льныя Тро́ицы бы́л еси́ и в темни́це, и во гра́дех изгна́ния сиби́рскаго, терпя́ гла́д, мра́з страны́ се́верныя и жесто́кость клевре́тов безбо́жных. Сего́ ра́ди пропове́дует Це́рковь Кры́мская вели́чия Бо́жия, явле́нная на тебе́, святи́телю Луко́. Мы́ же еди́нем се́рдцем и еди́неми усты́ воспева́ем Бо́гу: Аллилу́ия.
И́кос 6.
Возсия́л еси́, я́ко звезда́ лучеза́рная, красноя́рской па́стве и тамбо́вской, озаря́я ду́ши ве́рных и разгоня́я тьму́ нече́стия и безбо́жия. И испо́лнишася на тебе́ слова́ Христо́вы: блаже́ни есте́, егда́ поно́сят ва́м, и иждену́т, и реку́т вся́к зо́л глаго́л на вы́, лжу́ще, Мене́ ра́ди. Ты́ бо, гони́мый из гра́да во гра́д и клеветы́ терпе́вый, архипа́стырское служе́ние усе́рдне исполня́л еси́ и сла́достию писа́ний твои́х вся́ а́лчущия и жа́ждущия пра́вды насыща́л еси́, и́же благода́рне взыва́ют тебе́:
Ра́дуйся, наста́вниче, все́х к Небеси́ путеводя́й; ра́дуйся, о сла́ве Бо́жией и́скренно ревнова́вый.
Ра́дуйся, во́ине Христо́в непобеди́мый; ра́дуйся, за Христа́ Го́спода темни́цы и бие́ния терпе́вый.
Ра́дуйся, смире́ния Его́ и́стинный подража́телю; ра́дуйся, вмести́лище Ду́ха Свята́го.
Ра́дуйся, вше́дый с му́дрыми в ра́дость Го́спода твоего́; ра́дуйся, корыстолю́бия обличи́телю.
Ра́дуйся, па́губу тщесла́вия показа́вый; ра́дуйся, беззако́нники ко обраще́нию призыва́вый.
Ра́дуйся, тобо́ю бо Христо́с просла́вися; ра́дуйся, тобо́ю бо сатана́ посрами́ся.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 7.
Хотя́ досто́йно соверши́ти по́двиг, от Бо́га ти́ угото́ванный, обле́клся еси́ во вся́ ору́жия Бо́жия и ста́л еси́ на бра́нь проти́ву миродержи́телей тьмы́ ве́ка сего́, духо́в зло́бы поднебе́сных, препоя́сав чресла́ своя́ и́стиною и оде́явся в броню́ пра́вды, угаси́л еси́, испове́дниче Луко́, вся́ стре́лы лука́ваго, поя́ Соде́телю и Бо́гу: Аллилу́ия.
И́кос 7.
Но́вое гоне́ние воздвиго́ша беззако́ннии и безбо́жнии челове́цы на Це́рковь Правосла́вную и во глубину́ да́льния тае́жныя страны́ изгна́ша тя́, святи́телю Луко́, и бли́з сме́рти бы́в, руко́ю же Бо́жиею сохране́н, взыва́л еси́ со апо́столом Па́влом: до ны́нешняго часа́ и а́лчем, и жа́ждем, и наготу́ем, и стра́ждем, и скита́емся. Гони́ми, терпи́м; я́коже отре́бие ми́ру бы́хом, все́м попра́ние досе́ле. Сего́ ра́ди, ве́дуще о тебе́ такова́я, ублажа́ем тя́:
Ра́дуйся, испове́дниче Христо́в блаже́нный; ра́дуйся, мра́з лю́тый и гла́д во изгна́нии претерпе́вый.
Ра́дуйся, бли́з сме́рти бы́вый, Го́сподем же сохране́нный; ра́дуйся, самоотверже́ние всеце́лое показа́вый.
Ра́дуйся, уневе́стивый ду́шу твою́ Жениху́ Христу́; ра́дуйся, Го́спода, распя́таго на Кресте́, при́сно пред собо́ю предзре́вый.
Ра́дуйся, во бде́ниих и моли́твах неосла́бно пребы́вый; ра́дуйся, Единосу́щныя Тро́ицы и́стинный ревни́телю.
Ра́дуйся, вся́кия боле́зни ско́рый и безме́здный врачу́; ра́дуйся, от неисце́льных гно́йных боле́зней и ра́н стра́ждущия здра́вы возста́вивый.
Ра́дуйся, я́ко ве́рою твое́ю разсла́бленнии исцеле́ша.
Ра́дуйся, я́ко труды́ твои́ми враче́бными исцеле́ннии к ве́ре приведе́ни бы́ша.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 8.
Стра́нник во юдо́ли земне́й бы́в, терпе́ния, воздержа́ния и чистоты́ о́браз показа́л еси́, испове́дниче Луко́. Егда́ оте́чество в беде́ от наше́ствия иноплеме́нник пребыва́ше, любо́вь ева́нгельскую явля́я, денноно́щно во враче́бнице труди́лся еси́, исцеля́я неду́ги и ра́ны вожде́й и во́инов оте́чества земна́го, непамятозло́бием и любо́вию удивля́я все́х творя́щих ти́ напа́сти, и мно́гия си́м обрати́л еси́ ко Христу́, во е́же пе́ти Ему́: Аллилу́ия.
И́кос 8.
Ве́сь испо́лнь любве́ Христо́вы, Луко́ благосе́рде, ду́шу твою́ полага́л еси́ за дру́ги твоя́, и я́ко А́нгел храни́тель бы́л еси́ бли́жним и да́льним, злотворя́щия укроща́я, вражду́ющия примиря́я и спасе́ние все́м устроя́я. Помина́юще труды́ твоя́ во бла́го люде́й оте́чества твоего́, благода́рне взыва́ем ти́:
Ра́дуйся, ди́вную любо́вь ко оте́честву земно́му показа́вый; ра́дуйся, смире́ния и незло́бия учи́телю.
Ра́дуйся, изгна́ние и жесто́кия му́ки му́жественно претерпе́вый; ра́дуйся, за Христа́ страда́вый и му́чим бы́вый.
Ра́дуйся, тве́рдо Его́ испове́давый; ра́дуйся, зло́бу враго́в любо́вию Христо́вою победи́вый.
Ра́дуйся, о́тче благосе́рдый, спасе́ния мно́гих взыска́вый; ра́дуйся, вели́кими скорбьми́ искуше́нный.
Ра́дуйся, в гоне́ниих терпе́ние ди́вное яви́вый; ра́дуйся, я́ко за враги́ Го́сподеви моли́лся еси́.
Ра́дуйся, я́ко любо́вь твоя́ вся́ку вражду́ победи́; ра́дуйся, я́ко незло́бие твое́ сердца́ жесто́кая покори́.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 9.
Все́м бы́л еси́ вся́, я́коже и святы́й Па́вел, дабы́ спасти́ хотя́ бы не́которых, святи́телю Луко́, архипа́стырский по́двиг соверша́я, в Тамбо́вском кра́и мно́гими труды́ хра́мы обновля́я и созида́я, уста́вы святооте́ческия стро́го соблюда́я, спасе́нию па́ствы твоея́ служи́ти не престава́л еси́, чи́сто Бо́гови поя́: Аллилу́ия.
И́кос 9
Вети́и челове́честии не возмо́гут по достоя́нию изрещи́ твои́х благодея́ний мно́жество, егда́ яви́ся на Кры́мской земли́, я́ко оте́ц чадолюби́вый, святи́телю о́тче Луко́: щедрода́тельная бо десни́ца твоя́ всю́ду досяза́ше. Мы́ же, благосе́рдию твоему́ подража́ти хотя́ще, во удивле́нии взыва́ем к тебе́:
Ра́дуйся, луче́ любве́ Бо́жия; ра́дуйся, сокро́вище милосе́рдия Спа́сова неистощи́мое.
Ра́дуйся, я́ко вся́ своя́ неиму́щим раздава́л еси́; ра́дуйся, бли́жния твоя́ па́че себе́ возлюби́вый.
Ра́дуйся, стра́ждущих сиро́т пита́телю и окорми́телю; ра́дуйся, безпомо́щных ста́рцев и ста́риц попечи́телю.
Ра́дуйся, я́ко боля́щия и в темни́це заключе́нныя посеща́л еси́; ра́дуйся, я́ко ну́жды бе́дных во мно́зех ме́стех оте́чества своего́ предваря́л еси́.
Ра́дуйся, я́ко ни́щия ми́луя, трапе́зы и́м устроя́л еси́; ра́дуйся, я́ко о глубине́ милосе́рдия твоего́ Ма́ти Бо́жия возра́довася.
Ра́дуйся, а́нгеле земны́й и челове́че Небе́сный; ра́дуйся, я́ко коему́ждо в го́рестех, а́ки А́нгел уте́шитель, явля́лся еси́.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 10.
Спасе́нию кры́мския па́ствы твоея́ служи́ти многоле́тне не престава́я, по о́бразу Пастыренача́льника Христа́, на ра́мена заблу́ждшия взе́м, Небе́сному Отцу́ приве́л еси́, наде́ждею бо на Бо́жие милосе́рдие утеша́я, ко исправле́нию жития́ словесы́ учи́тельными твои́ми вле́кл еси́ вся́, во е́же се́рдцем чи́стым пе́ти Бо́гу: Аллилу́ия.
И́кос 10.
Царя́ Небе́снаго Христа́ Бо́га ве́рный служи́тель бы́в, святи́телю о́тче Луко́, неуста́нно возвеща́л еси́ сло́во И́стины во все́х хра́мех земли́ Таври́ческия, душеспаси́тельною пи́щею уче́ния ева́нгельскаго ве́рная ча́да пита́я и уста́в церко́вный стро́го исполня́ти повелева́я. Те́мже тя́, я́ко па́стыря до́браго, прославля́ем си́це:
Ра́дуйся, неутоми́мый пропове́дниче ева́нгельския пра́вды; ра́дуйся, я́ко Бо́гом вруче́нное тебе́ ста́до слове́сное до́бре упа́сл еси́.
Ра́дуйся, о́вцы своя́ от душепа́губных волко́в охраня́вый; ра́дуйся, чи́на церко́внаго стро́гий блюсти́телю.
Ра́дуйся, чистоты́ ве́ры правосла́вныя охрани́телю; ра́дуйся, тобо́ю бо Ду́х Святы́й написа́ словеса́ спаси́тельная.
Ра́дуйся, мудреце́м ве́ка сего́ бытие́ Бо́жие пропове́давый; ра́дуйся, я́ко сло́во твое́, а́ки в ри́зы позлаще́ны, в та́йны ве́ры оде́яся.
Ра́дуйся, мо́лние, горды́ню низлага́ющая; ра́дуйся, гро́ме, беззако́нно живу́щия устраша́яй.
Ра́дуйся, церко́внаго благоче́стия насади́телю; ра́дуйся, архипа́стырю, па́стыри духо́вныя наставля́яй и вразумля́яй непреста́нно.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 11.
Пе́ние у гро́ба твоего́, уго́дниче Бо́жий, не умолка́ше во дне́х блаже́ннаго успе́ния твоего́. Мно́зи бо, ве́дуще тя́ богоно́сна и равноа́нгельна, собра́шася от все́х преде́л земна́го оте́чества твоего́ соверши́ти моле́ние собо́рное о души́ твое́й, в го́рния оби́тели Оте́чества Небе́снаго восходя́щей, воспева́юще Бо́гу: Аллилу́ия.
И́кос 11.
Свеще́ю, в Це́ркви Христо́вей горя́щею све́том невеще́ственным благода́ти Бо́жия, бы́л еси́, святи́телю Луко́, вся́ концы́ земли́ на́шея озаря́я. Помина́юще блаже́нное успе́ние и ве́лие твое́ на Небеси́ и на земли́ прославле́ние, с ра́достию прино́сим ти́ благохвале́ния сия́:
Ра́дуйся, свети́льниче неме́ркнущий Све́та Невече́рняго; ра́дуйся, я́ко мно́зи просла́виша твои́х ра́ди до́брых де́л Отца́ Небе́снаго.
Ра́дуйся, уго́дниче Бо́жий, тече́ние благоче́стне сконча́вый; ра́дуйся, ве́ру, наде́жду и любо́вь от Го́спода стяжа́вый.
Ра́дуйся, со Христо́м, Его́же возлюби́л еси́, на ве́ки соедини́выйся; ра́дуйся, Ца́рствия Небе́снаго и сла́вы ве́чныя насле́дниче.
Ра́дуйся, я́ко све́т до́брых де́л твои́х пред челове́ки просвети́ся; ра́дуйся, мно́гих научи́вый за́поведем Христо́вым и сотвори́вый я́.
Ра́дуйся, архиере́ю, от Ве́чнаго Архиере́я Христа́ благода́тными да́ры испо́лненный; ра́дуйся, ско́рый помо́щниче призыва́ющим тя́.
Ра́дуйся, земли́ Кры́мския но́вое свети́ло и утвержде́ние; ра́дуйся, ро́да христиа́нскаго благода́тный покрови́телю.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 12.
Благода́ть, свы́ше ти́ да́нную, позна́вше, благогове́йно лобыза́ем честны́й о́браз тво́й, святи́телю Луко́, ча́юще тобо́ю прия́ти проси́мое от Бо́га. Те́мже припа́дающе ко святе́й ико́не твое́й (а́ще же пред мощьми́ глаго́леши: ко святы́м моще́м твои́м), со умиле́нием мо́лим тя́: укрепи́ на́с до́бре стоя́ти в ве́ре правосла́вней, и угожда́юще благи́ми де́лы, немо́лчно пе́ти Бо́гу: Аллилу́ия.
И́кос 12.
Пою́ще Бо́га, ди́внаго во святы́х Свои́х, хва́лим тя́, Христо́ва испове́дника, святи́теля и предста́теля пред Го́сподем. Ве́сь бо еси́ в вы́шних, но и ни́жних не оставля́еши, святи́телю о́тче Луко́, при́сно со Христо́м ца́рствуеши и о на́с гре́шных пред Престо́лом Бо́жиим хода́тайствуеши. Сего́ ра́ди во умиле́нии зове́м ти́:
Ра́дуйся, Све́та непристу́пнаго зри́телю; ра́дуйся, тебе́ бо сора́дуются А́нгели и о тебе́ веселя́тся челове́цы.
Ра́дуйся, де́лы и писа́ньми твои́ми неве́рующия просвеща́яй; ра́дуйся, малове́рныя и малоду́шныя укрепля́яй и утвержда́яй.
Ра́дуйся, я́ко досто́ин яви́лся еси́ Ца́рствия Небе́снаго; ра́дуйся, путе́м испове́дничества ра́йских селе́ний дости́гнувый.
Ра́дуйся, поноше́ния Христа́ ра́ди терпе́вый и ве́чную с Ни́м сла́ву прие́мый; ра́дуйся, ду́ши на́ша к Ца́рствию Небе́сному путеводя́й.
Ра́дуйся, предста́телю пред Престо́лом Бо́жиим за на́с гре́шных; ра́дуйся, Правосла́вия похвало́ и земли́ на́шея ра́дование.
Ра́дуйся, в со́нме святы́х бы́ти сподо́бивыйся; ра́дуйся, собо́ру все́х Кры́мских святы́х соприча́стниче.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 13.
О вели́кий и пресла́вный уго́дниче Бо́жий, святи́телю о́тче на́ш Луко́, приими́ сие́ похва́льное пе́ние от на́с недосто́йных, с любо́вию сыно́внею тебе́ приноси́мое! Предста́тельством твои́м у Престо́ла Бо́жия и моли́твами твои́ми все́х на́с в ве́ре правосла́вней и до́брых де́лех утверди́, от вся́ких бе́д, скорбе́й, боле́зней и напа́стей, в се́й жи́зни находя́щих, сохрани́, и от муче́ний в бу́дущем ве́це изба́ви и сподо́би в ве́чней жи́зни ку́пно с тобо́ю и со все́ми святы́ми пе́ти Творцу́ на́шему: Аллилу́ия.
И́кос 1.
А́нгелов собесе́дниче и челове́ков наста́вниче, Луко́ пресла́вный, подо́бне евангели́сту и апо́столу Луце́, ему́же тезоимени́т сы́й, от Бо́га да́р цели́ти неду́ги челове́ческия прия́л еси́, мно́гия труды́ подъе́мля во врачева́нии боле́зней бли́жних, пло́ть нося́, о пло́ти не раде́л еси́, де́лы же до́брыми Отца́ Небе́снаго просла́вил еси́. Те́мже благода́рне во умиле́нии зове́м ти́:
Ра́дуйся, от ю́ности ра́зум сво́й и́гу Христо́ву покори́вый; ра́дуйся, пречестно́е Святы́я Тро́ицы селе́ние бы́вый.
Ра́дуйся, блаже́нство ми́лостивых, по сло́ву Го́спода, унасле́довавый; ра́дуйся, ве́рою Христо́вою и зна́нием богодарова́нным мно́гия неду́жныя исцели́вый.
Ра́дуйся, стра́ждущих неду́ги теле́сными врачу́ милосе́рдый; ра́дуйся, во дни́ бра́ни вожде́й и во́инов цели́телю иску́сный.
Ра́дуйся, все́х враче́в наста́вниче; ра́дуйся, ско́рый в ну́ждах и ско́рбех су́щим помо́щниче.
Ра́дуйся, Це́ркве Правосла́вныя утвержде́ние; ра́дуйся, земли́ на́шея озаре́ние.
Ра́дуйся, кры́мския па́ствы похвале́ние; ра́дуйся, гра́да Симферо́поля украше́ние.
Ра́дуйся, святи́телю и испове́дниче Луко́, врачу́ благи́й и ми́лостивый.
Конда́к 1.
Избра́нный святи́телю Це́ркве Правосла́вныя и испове́дниче, возсия́вый стране́ на́шей, я́ко светоза́рное свети́ло, до́бре потруди́выйся и за и́мя Христо́во гоне́ние претерпе́вый, прославля́юще просла́вльшаго тя́ Го́спода, дарова́вшаго на́м тебе́ но́ваго моли́твенника и помо́щника, похва́льное воспева́ем ти́ пе́ние; ты́ же, я́ко име́яй ве́лие дерзнове́ние ко Влады́це Небесе́ и земли́, от вся́ких неду́гов душе́вных и теле́сных свободи́ на́с и до́бре стоя́ти во Правосла́вии укрепи́, да вси́ во умиле́нии зове́м ти́: Ра́дуйся, святи́телю и испове́дниче Луко́, врачу́ благи́й и ми́лостивый.
Моли́тва.
О всеблаже́нный испове́дниче, святи́телю о́тче на́ш Луко́, вели́кий уго́дниче Христо́в! Со умиле́нием прекло́ньше коле́на серде́ц на́ших, моля́щеся пред святы́м о́бразом твои́м (а́ще же пред мощьми́ глаго́леши: и припа́дающе к честны́м и многоцеле́бным моще́м твои́м), я́коже ча́да отца́, мо́лим тя́ всеусе́рдно: услы́ши на́с гре́шных и принеси́ моли́тву на́шу к ми́лостивому Человеколю́бцу Бо́гу, Ему́же ты́ ны́не в ра́дости святы́х и с ли́ки А́нгел предстои́ши. Ве́руем бо, я́ко лю́биши ны́ то́ю же любо́вию, е́юже вся́ бли́жния возлюби́л еси́, на земли́ пребыва́я.
Испроси́ у Христа́ Бо́га на́шего, да утверди́т во Святе́й Свое́й Правосла́вней Це́ркви ду́х пра́выя ве́ры и благоче́стия, па́стырем ея́ да да́ст ре́вность святу́ю и попече́ние о спасе́нии па́ствы, вве́ренныя и́м: пра́во ве́рующия соблюда́ти, сла́быя и немощны́я в ве́ре укрепля́ти, неве́дущия наставля́ти, проти́вныя облича́ти. Все́м на́м пода́й да́р, коему́ждо благопотре́бен, и вся́, я́же к жи́зни вре́менней и к ве́чному спасе́нию поле́зная: градо́в на́ших утвержде́ние, земли́ плодоно́сие, от гла́да и па́губы избавле́ние, скорбя́щим утеше́ние, неду́гующим исцеле́ние, заблу́ждшим на пу́ть и́стины возвраще́ние, роди́телем благослове́ние, ча́дом в стра́се Госпо́днем воспита́ние и науче́ние, си́рым и убо́гим по́мощь и заступле́ние.
Пода́ждь все́м на́м твое́ архипа́стырское свято́е благослове́ние, да те́м осеня́еми, изба́вимся от ко́зней лука́ваго и избе́гнем вся́кия вражды́ и нестрое́ний, ересе́й и раско́лов.
Да́руй на́м по́прище жи́зни вре́менныя богоуго́дно прейти́, наста́ви на́с на пу́ть, веду́щий в селе́ния пра́ведных, изба́ви возду́шных мыта́рств и моли́ о на́с Всеси́льнаго Бо́га, да в ве́чней жи́зни с тобо́ю непреста́нно сла́вим Отца́, и Сы́на, и Свята́го Ду́ха, в Тро́ице сла́вимаго Бо́га, Ему́же подоба́ет вся́кая сла́ва, че́сть и держа́ва во ве́ки веко́в. Ами́нь.
