Преподобный Сергий Радонежский


Преподобный  Сергий  Радонежский

Преподобный  Сергий  Радонежский,  основатель  Троице-Сергиевой  Лавры,  величайший  подвижник,  пламенный  молитвенник  за  землю  русскую,  истинный  служитель  Живоначальной  Троицы,  родился  в  благочестивой  семье  ростовских  бояр  Кирилла  и  Марии  3  мая  1314  года.

Преподобный  Сергий  Радонежский  предназначен  был  Господом  стать  избранным  сосудом  Божией  благодати.  Господь  явил  чудное  знамение  родителям  преподобного  Сергия,  в  миру  Варфоломея,  еще  до  его  рождения.

Когда  мать  его  стояла  в  храме  на  Божественной  литургии,  то  было  троекратное  возглашение  младенца,  который  пребывал  еще  во  чреве:  перед  чтением  Евангелия,  при  начале  пения  Херувимской,  при  возглашении  священника  «Святая  святым».

Это  происшествие  в  храме  было  столь  необычным,  что  убедительно  показало,  что  будет  младенец  благодатной  жизни,  будет  с  Богом  и  явит  всем  свет  Божественной  благодати.  Преподобный  Сергий  Радонежский  еще  младенцем  служил  Богу.

В  среду  и  пятницу  он  воздерживался  от  пищи.  Если  мать  вкушала  мясо,  он  даже  не  прикасался  к  груди  материнской,  и  она,  поняв  свое  служение  великому  отроку,  совершенно  отказалась  от  мяса.

Когда  Варфоломея  отдали  обучаться  грамоте,  то  было  угодно  Богу,  чтобы  он  получил  разумение  книжному  научению  от  Самого  Бога.  Поначалу  грамота  ему  ну  никак  не  давалась,  в  то  время  как  братья  его  преуспевали  в  учении.

И  вот  однажды  в  поле  Варфоломей  встретил  благоговейного  старца,  ангелоподобного  мужа.  Отрок  со  слезами  поведал  ему  о  своем  горе.  Помолился  о  нем  старец,  дал  вкусить  просфоры  святой  и  сказал:

«Отныне  ты  будешь  все  разуметь.  Бог  дает  тебе  премудрость,  и  ты  превзойдешь  и  своих  братьев,  и  всех  товарищей  своих».

Когда  отроку  Варфоломею  исполнилось  14  лет,  родители  его  переселились  в  Радонежские  приделы.  С  1308  года  монастырь  уже  в  Хотькове  был,  он  был  смешанный.  Там  были  и  старцы,  и  старицы  на  покаянии.

Там  и  приняли  преподобные  Кирилл  и  Мария  ангельский  чин,  схиму.  Там  и  упокоил  их  преподобный  Сергий  Радонежский  в  1337  году.  Желание  служить  только  Богу  у  юного  Варфоломея  было  очень  велико.

Ему  хотелось  уединиться  по  примеру  древних  подвижников,  но  любовь  к  родителям  удерживала  его  в  родной  семье.  Варфоломей  был  скромен,  тих  и  молчалив,  со  всеми  был  кроток  и  ласков,  никогда  не  раздражался  и  обнаруживал  совершенное  повиновение  родителям.

После  смерти  родителей  Варфоломей  предоставил  наследство  своему  младшему  брату  Петру  и  вместе  со  старшим  братом  Стефаном  поселился  в  десяти  верстах  от  Радонежа,  в  глубоком  лесу  около  речки  Кончуры.

Братья  рубили  лес  своими  руками  и  построили  себе  келью  и  маленькую  церковь.  Эту  церковь  священник,  посланный  митрополитом  Феогностом,  освятил  в  честь  Святой  Троицы.  Так  было  заложено  основание  знаменитой  на  весь  мир  Троице-Сергиевой  Лавры.

Вскоре  Стефан  оставил  своего  брата  и  стал  настоятелем  Богоявленского  монастыря  в  Москве  и  духовником  великого  князя.  Варфоломей,  постриженный  в  монашество  с  именем  Сергий,  около  двух  лет  подвизался  один  в  лесу.

Он  преодолел  огромное  количество  искушений.  Этот  период  святые  отцы  называют  «крестом  деятельным».  Идет  борьба  с  ветхим  человеком.  Благодать  Божия  укрепляет  в  вере  и  благочестии,  а  дух  злобы,  дух  тьмы  старается  смутить  подвижника.

Когда  преподобный  Сергий  Радонежский  прошел  эти  суровые  испытания,  Господь  очистил  его  сердце  и  дал  вкусить  благодать  Духа  Пресвятого.  И  вот  преподобный  Сергий  после  «креста  деятельного»  вошел  в  жизнь  созерцательную.

Он  беседовал  с  Богом,  он  слышал  глаголы  невещественные,  умные,  мысленные  Самого  Бога,  и  Ангелов,  и  Матери  Божией,  потому  что  он,  как  чистый  сосуд,  приял  Духа  Святого.  Это  Дух  Святой  открывал  ему  все.

Как  ни  старался  святой  Сергий  скрывать  свои  подвиги,  слава  о  них  распространилась  и  влекла  к  нему  других  иноков,  желавших  спасаться  под  его  руководством.  Они  стали  просить  Сергия  принять  сан  священника  и  игумена.

Долго  он  уклонялся,  так  как  его  совершенно  не  привлекала  слава,  должности,  звания,  богатство.  Он  жаждал  уединения,  молитвы.  Но  он  пламенно  любил  Русь  и  понимал  свое  предназначение  служить  земле  русской  всеми  своими  дарованиями,  от   Бога  данными.

Святой  преподобный  Сергий  Радонежский  подавал  братии  пример  строжайшего  воздержания,  глубочайшего  смирения  и  непоколебимого  упования  на  помощь  и  волю  Божию.  В  трудах  и  подвигах  он  шел  первым,  и  братия  следовала  за  ним.

Слух  о  святом  Сергии  достиг  Константинополя,  и  патриарх  Филофей  прислал  ему  свое  благословение  и  грамоту,  которой  утверждались  новые  порядки  пустынного  общинножития,  заведенные  основателем  Свято-Троицкой  обители.

Еще  при  жизни  преподобный  Сергий  Радонежский  совершал  чудеса  и  удостаивался  великих  откровений.  Когда  он  служил  Божественную  литургию,  он  видел  Ангелов,  и  они  сослужали  ему,  вознося  молитву  к  Богу.

Этот  святой  угодник  Божий  был  дарован  Руси  в  тяжелую  для  нее  годину  господства  Золотой  Орды.  Это  были  страшные  дикие  племена  и  скорбные  годы  для  Руси:  грабежи,  жестокие  убийства,  голод,  разорения. 

Им  сопутствовали  бесконечные  моровые  поветрия,  косившие  тысячи  жизней.  Но  вера  православная  спасла  Русь,  потому  что  все  уповали  на  Бога  и  хранили  веру  православную.  Много  молитвенников  родила  наша  земля. 

Среди  них  особо  стоит  преподобный  Сергий  Радонежский,  защитник  и  великий  молитвенник  за  землю  русскую,  ходатай  за  Русь  перед  Богом  и  Матерью  Божией,  светило  незаходимое.  И  это  святое  делание  он  продолжает  уже  у  престола  Господнего.

За  полгода  до  своей  блаженной  кончины  преподобный  получил  откровение  от  Бога.  Он  отечески  беседовал  с  братией  это  время,  наставляя  и  передавая  им  свои  заветы.

Преподобный  Сергий  Радонежский  тихо,  благодатно  отошел  ко  Господу  после  причащения  Святых  Христовых  Таин  25  сентября  1392  года.  Через  30  лет  после  его  блаженной  кончины  открылись  его  святые  мощи.

Осталась  стоять  на  земле  твердыня  Православия — Троице-Сергиева  Лавра,  как  увековеченный  памятник  преподобному  Сергию  Радонежскому.  Троице-Сергиева  Лавра  распространила  от  себя  во  все  стороны  множество  обителей.

Лавра  охватывала  ими,  как  бы  сетью,  весь  север  и  стягивала  его  к  церковному  и  государственному  центру  России — Москве.  Одни  из  них  были  созданы  еще  при  жизни  преподобного,  другие — после  его  блаженной  кончины  его  учениками.

Память:  5  /  18  июля,  25  сентября  /  8  октября.

МОЛИТВЫ

Тропарь  общий  преподобным  Сергию  и  Никону  Радонежским,   глас  8

Я́ко трисве́тлаго со́лнца светоза́рныи зве́зды,/ Тро́ическим све́том озаря́ете сердца́ ве́рных,/ сосу́да Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и все́м лю́дем,/ вся́ бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, собра́нное ва́ми,/ но и ны́не мо́лим ва́с:/ посеща́йте ча́д свои́х, я́ко иму́щие дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

Перевод: Как от преяркого Солнца блистающие звезды, Троическим светом вы озаряете сердца верующих, став сосудами Света Пресвятой Троицы, и преудивительным вашим житием для монахов были неизменными законодателями и церквам украшение, и благоверным, и святителям и всем людям, ибо отогнав отсюда всю демонскую нечистоту своими чистыми учениями и делами, вы прекрасно упасли стадо, собранное вами, потому мы и сейчас молим вас: «Не забывайте о чадах своих, как имеющие дерзновение ко Святой Троице, Богомудрый Сергий с удивительным учеником своим Никоном, и молите Христа Бога, да спасет души наши».

Тропарь  преподобному  Сергию  Радонежскому  на  обретение  мощей,  глас 8

От ю́ности восприя́л еси́ Христа́ в души́ твое́й, преподо́бне/ и па́че всего́ вожделе́л еси́ мирска́го мяте́жа уклони́тися:/ му́жески в пусты́ню всели́лся еси́,/ и ча́да послуша́ния в ней, плоды́ смире́ния, возрасти́л еси́./ Тем, быв Тро́ице вселе́ние,/ чудесы́ твои́ми всех просвети́л еси́, приходя́щих к тебе́ ве́рою,/ и исцеле́ния всем подая́ оби́льно.// О́тче наш Се́ргие, моли́ Христа́ Бо́га, да спасе́т ду́ши на́ша.

Перевод: С юности ты принял Христа в душу твою, преподобный, и более всего возжелал от мирской суеты уклониться, мужественно в пустыню вселился, и чада послушания – смирения плоды в ней возрастил. Потому, став Троицы селением, чудесами твоими ты просветил всех, приходящих к тебе с верою, и исцеления всем подаешь обильно. Отче наш Сергий, моли Христа Бога да спасет души наши.

Тропарь  преподобному  Сергию  Радонежскому  на  обретение  мощей,  глас   4

Днесь пресве́тло красу́ется ца́рствующий град Москва́,/ я́ко светолу́чными заря́ми, мо́лниями чуде́с твои́х осия́емь,/ всю вселе́нную созыва́ет/ похвали́ти тя, Богому́дре Се́ргие;/ пречестна́я же и сла́вная оби́тель твоя́,/ ю́же во и́мя Святы́я Тро́ицы мно́гими труды́ твои́ми созда́л еси́, о́тче,/ иму́щи в себе́ стада́ учени́к твои́х,/ весе́лия и ра́дости исполня́ется./ Мы же, пра́зднующе пресла́вное обре́тение честны́х моще́й твои́х, в земли́ сокрове́нных,/ я́ко цвет благоуха́нен и кади́ло благово́нно,/любе́зно я́ лобыза́юще, разли́чная исцеле́ния прие́млем/ и твои́ми моли́твами грехо́в проще́ния сподобля́емся,/ о́тче преподо́бне Се́ргие,/ моли́ Святу́ю Тро́ицу// спасти́ ду́ши на́ша.

Перевод: Сегодня светло радуется царствующий город Москва, как лучезарным сиянием, молниями чудес твоих озаряем, всю вселенную созывает прославить тебя, Богомудрый Сергий. Почитаемая и славная обитель же твоя, которую во Имя Святой Троицы ты создал многими трудами твоими, отче, имея у себя стада учеников твоих, наполняется торжеством и радостью. Мы же, празднуя преславное обретение священных мощей твоих, сокрытых в земле, как благоухающий цветок и благовонное кадило, благоговейно их целуя, различные исцеления получаем и по твоим молитвам удостаиваемся прощения грехов, отче преподобный Сергий, моли Святую Троицу о спасении душ наших.

Тропарь  преподобному  Сергию  Радонежскому  на  преставление

И́же доброде́телей подви́жник,/ я́ко и́стинный во́ин Христа́ Бо́га,/ на стра́сти вельми́ подвиза́лся еси́ в жи́зни вре́менней,/ в пе́ниих, бде́ниих же и поще́ниих о́браз быв твои́м ученико́м;/ те́мже и всели́ся в тя Пресвяты́й Дух,/ Его́же де́йствием све́тло укра́шен еси́./ Но я́ко име́я дерзнове́ние ко Святе́й Тро́ице,/ помина́й ста́до, е́же собра́л еси́, му́дре,/ и не забу́ди, я́коже обеща́лся еси́,/ посеща́я чад твои́х,// Се́ргие преподо́бне, о́тче наш.

Перевод: Добродетелей подвижник, ты, как истинный воин Христа Бога, против страстей крепко подвизался в жизни временной, в псалмопении, бдении и постах став примером для твоих учеников. Потому и вселился в тебя Пресвятой Дух: Его действием ты украшен светло. Но имея дерзновение ко Святой Троице, поминай стадо, собранное тобой премудро, и не забудь, как ты обещал, посещать детей твоих, Сергий, преподобный отче наш.

Тропарь  преподобному  Сергию  Радонежскому  на  преставление,  глас  8

В чистоте́ жития́ исто́чник слез твои́х, испове́дания трудо́вныя по́ты совокупи́л еси́, и купе́ль духо́вную источи́л еси́, свяще́нный Се́ргие, преподо́бне, омыва́вши сугу́бстве творя́щим любо́вию па́мять твою́ скве́рны обоя́мы душе́вныя и теле́сныя. Сих ра́ди, ча́да твоя́ су́ще, вопие́м ти: моли́, о́тче, Святу́ю Тро́ицу о душа́х на́ших.

Перевод: В чистоте жития источник слез твоих ты соединил с по́том подвигов веры, и тем источил духовную купель, святой преподобный Сергий, в которой омываешь душевную и телесную нечистоту всех почитающих с любовью память твою. Поэтому мы, чада твои, взываем к тебе: «Моли, отче, Святую Троицу о душах наших».

Кондак  общий  преподобным  Сергию  и  Никону  Радонежским  на  обретение  мощей,  глас  8

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко а́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно ва́с почита́ем и любо́вию вопие́м ва́м:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Перевод: В пощении став подобными Великому Антонию и подражав в подвигах Евфимию Иерусалимскому, вы были как ангелы на земле, всегда просвещая, преподобные, сердца верующих Божественными знамениями и чудесами. Потому с радостью вас почитаем и с любовью к вам взываем: «Радуйтесь, преподобные отцы Сергий и Никон, постников украшение и всей Российской земли великая сила».

Кондак  преподобному  Сергию  Радонежскому  на  обретение  мощей,  глас  8

Днесь я́ко со́лнце пресве́тло,/ возсия́вше от земли́, честны́я мо́щи твоя́ нетле́нны обрето́шася,/ я́ко благоуха́нный цвет, мно́жеством чуде́с сия́юще,/ и всем ве́рным источа́юще разли́чная исцеле́ния,/ и веселя́ще избра́нное твое́ ста́до,/ е́же му́дре собра́в, до́бре па́ствил еси́./ О ни́хже и ны́не Тро́ице предстои́ши, моля́ся,/ и во́инству победи́тельная на враги́ дарова́ти да вси́ вопие́м ти:// ра́дуйся, Се́ргие Богому́дре.

Перевод: В сей день как солнце пресветлое, воссиявшее от земли, священные мощи твои обретены нетленными, как благоуханный цвет множеством чудес сияя, и всем верным источая различные исцеления, и веселя избранное твое стадо, которое мудро собрав, ты прекрасно пас. О них и ныне, Троице предстоя, молишься победы над врагами верным даровать, дабы мы возглашали тебе: «Радуйся, Сергий Богомудрый!»

Кондак  преподобному  Сергию  Радонежскому  на  обретение  мощей,  глас  8

Взира́юще на предлежа́щий честны́й твой гроб,/ в не́мже скры́ся, я́ко многоце́нное сокро́вище, свято́е трудолю́бное твое́ те́ло чистоты́,/ мы, ча́да твоя́ су́ще жа́лостная,/ в удивле́нии еди́н со еди́нем веща́юще, вопие́м:/ о́тче наш Се́ргие, моли́ Святу́ю Тро́ицу// и нам спасти́ся, твои́м ча́дом.

Перевод: Взирая на стоящий перед нами почитаемый твой гроб, в нем же сокрыто, как драгоценное сокровище, святое подвижническое твое праведное тело, мы, чада твои, пребывая в горести, в исступлении друг к другу обращаясь, взываем: «Отче наш Сергий, моли Святую Троицу, чтобы и нам спастись, твоим чадам».

 

Кондак  преподобному  Сергию  Радонежскому  на  преставление,  глас  8

Христо́вою любо́вию уязви́вся, преподо́бне,/ и Тому́ невозвра́тным жела́нием после́довав,/ вся́кое наслажде́ние плотско́е возненави́дел еси́,/ и я́ко со́лнце Отече́ству твоему́ возсия́л еси́;/ тем и Христо́с да́ром чуде́с обогати́ тя./ Помина́й нас чту́щих пресве́тлую па́мять твою́, да зове́м ти:// ра́дуйся, Се́ргие Богому́дре.

Перевод: Любовью ко Христу уязвленный, и за Ним с неуклонной волей следуя, всякое наслаждение плотское возненавидел ты, преподобный, и как солнце Отечеству твоему воссиял: потому и Христос даром чудес обогатил тебя. Поминай нас, почитающих пресветлую память твою, дабы мы взывали тебе: «Радуйся, Сергий Богомудрый!»

Кондак  преподобному  Сергию  Радонежскому  на  преставление,  глас  8

Я́ко безпло́тным равножи́тель всех преподо́бных превозше́л еси́ по́стническими труды́ и бде́нии моли́твенными, му́дре Се́ргие, тем восприя́л еси́ от Бо́га исцели́ти неду́ги и прогони́ти бе́сы и того́ ра́ди вопие́м ти: ра́дуйся, о́тче преподо́бне Се́ргие.

Перевод: Как равный житием бесплотным (ангелам) ты превзошел всех преподобных постническими трудами и молитвенными бдениями, мудрый Сергий, поэтому получил от Бога (благодать) исцелять болезни и изгонять бесов, потому и мы взываем к тебе: «Радуйся, отче преподобный Сергий».

Величание  преподобному  Сергию  Радонежскому

Ублажа́ем тя, преподо́бне о́тче Се́ргие, / и чтим святу́ю па́мять твою́, наста́вниче мона́хов и собесе́дниче а́нгелов.

Молитва  первая  преподобному  Сергию  Радонежскому

О, свяще́нная главо́, преподо́бне и Богоно́сне о́тче наш Се́ргие, моли́твою твое́ю, и ве́рою и любо́вию, я́же к Бо́гу, и чистото́ю се́рдца, еще́ на земли́ во оби́тель Пресвяты́я Тро́ицы ду́шу твою́ устро́ивый, и а́нгельскаго обще́ния и Пресвяты́я Богоро́дицы посеще́ния сподо́бивыйся, и дар чудоде́йственныя благода́ти прие́мый, по отше́ствии же твое́м от земны́х наипа́че к Бо́гу прибли́живыйся, и Небе́сныя си́лы приобщи́выйся, но и от нас ду́хом любве́ своея́ не отступи́вый, и честны́я твоя́ мо́щи, я́ко сосу́д благода́ти по́лный и преизлива́ющийся, нам оста́вивый! Ве́лие име́я дерзнове́ние ко Всеми́лостивому Влады́це, моли́ спасти́ рабы́ Его́, су́щей в тебе́ благода́ти Его́ ве́рующия и к тебе́ с любо́вию притека́ющия. Испроси́ нам от великодарови́таго Бо́га на́шего вся́кий дар, всем и коему́ждо благопотре́бен, ве́ры непоро́чны соблюде́ние, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нных сохране́ние, скорбя́щим утеше́ние, неду́гующим исцеле́ние, па́дшим возставле́ние, заблу́дшим на путь и́стины и спасе́ния возвраще́ние, подвиза́ющимся укрепле́ние, благоде́лающим в дела́х благи́х преспе́яние и благослове́ние, младе́нцем воспита́ние, ю́ным наставле́ние, неве́дущим вразумле́ние, сирота́м и вдови́цам заступле́ние, отходя́щим от сего́ вре́менного жития́ к ве́чному благо́е уготовле́ние и напу́тствие, отше́дшим блаже́нное упокое́ние, и вся ны споспешеству́ющими твои́ми моли́твами сподо́би в день Стра́шнаго суда́ шу́ия ча́сти изба́витися, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Молитва  вторая  преподобному  Сергию  Радонежскому

О, свяще́нная главо́, преподо́бне о́тче, преблаже́нне а́вво Се́ргие вели́кий! Не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упасл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́, не премолчи́ за ны ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных у престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый; а́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́теля предстоя́щи, досто́йно весели́тся. Ве́дуще бо тя вои́стинну и по сме́рти жи́ва су́ща, тебе́ припа́даем и тебе́ мо́лимся, е́же моли́тися о нас Всеми́лостивому Бо́гу о по́льзе душ на́ших, и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в, возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.

Молитва  третья  преподобному  Сергию  Радонежскому

О, Небе́снаго граждани́не Иерусали́ма, преподо́бне о́тче Се́ргие! Воззри́ на нас ми́лостиво и к земли́ приве́рженных возведи́ к высоте́ Небе́сней. Ты горе́ на Небеси́; мы на земли́ ни́зу, удалены́ от тебе́ не то́лько ме́стом, ели́ко греха́ми свои́ми и беззако́ниями; но к тебе́, я́ко нам сро́дному, прибега́ем и взыва́ем: наста́ви нас ходи́ти путе́м твои́м, вразуми́ и руково́дствуй. Сво́йственно есть тебе́, о́тче наш, благоутро́бие и человеколю́бие: на земли́ живу́щу, не о свое́м то́кмо спасе́нии бысть тебе́ попече́ние, но и о всех к тебе́ притека́ющих наставле́ния твоя́ бы́ша тро́стию кни́жника скоропи́сца, на се́рдце ка́ждаго глаго́лы жи́зни начертава́ющего. Не теле́сныя то́кмо врачева́л еси́ боле́зни, но па́че душе́вных врач изя́щный яви́лся еси́; и вся твоя́ свята́я жизнь бысть зерца́лом вся́кия доброде́тели. А́ще толи́к был еси́, свя́тче Бо́жий, на земли́, коли́к ны́не еси́ на Небеси́! Ты днесь предстои́ши Престо́лу Све́та Непресту́пнаго и в Нем, я́ко в зерца́ле, зри́ши вся на́ша ну́жды и проше́ния; ты водворя́ешися со А́нгелы о еди́ном гре́шнице ка́ющемся ра́дующимися. И человеколю́бие Бо́жие есть, неистощи́мо, и твое́ к Нему́ дерзнове́ние мно́го, не преста́ни о нас вопия́ ко Го́споду. Испроси́ предста́тельством свои́м у Всеми́лостиваго Бо́га на́шего мир Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ нас, к тебе́ с ве́рою притека́ющих. А́ще бо и недосто́йни есмы́ толи́каго отца́ и хода́тая, но ты, быв подража́тель человеколю́бия Бо́жия, сотвори́ нам досто́йны чрез обраще́ние от злых дел к благо́му житию́. Вся богопросвеще́нная Росси́я, твои́ми чудесы́ испо́лненная и ми́лостями облагоде́тельствованная, испове́дует тя бы́ти своего́ покрови́теля и засту́пника. Яви́ дре́вния ми́лости твоя́ и и́хже отце́м спомоществова́л еси́, не отри́ни и нас, чад их, стопа́ми их к тебе́ ше́ствующих. Ве́руем, я́ко ду́хом нам сопрису́тствуеши. Иде́же бо есть Госпо́дь, я́коже сло́во Его́ учи́т нас, та́мо и слуга́ Его́ бу́дет. Ты ве́рный еси́ раб Госпо́день, и Бо́гу везде́ су́щу, ты в Нем еси́, и Он в тебе́ есть, па́че же и те́лом с на́ми еси́. Се нетле́нныя и живоно́сныя твоя́ мо́щи, я́ко сокро́вище безце́нное, вручи́ нам чуде́с Бог. Предстоя́ще им, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ их на же́ртвенник благоутро́бия Бо́жия, да прии́мем тобо́ю благода́ть и благовре́менну в ну́ждах на́ших по́мощь. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки моли́твами твои́ми. Па́ству же твою́ духо́вную, тобо́ю со́бранную, не преста́ни управля́ти жезло́м духо́вныя му́дро­сти, подвиза́ющимся помози́, разсла́бленных возста́ви, споспеши́ и́го Христо́во нести́ во благоду́шии и терпе́нии и всех нас упра́ви в ми́ре и покая́нии сконча́ти живо́т наш и пресели́тися со упова́нием в блаже́нная не́дра Авраа́мова, иде́же ты ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.

 

Акафист   святому  преподобному  Сергию  Радонежскому  и  всея  Руси  чудотворцу 

Со­став­лен в ХVIII ве­ке мит­ро­по­ли­том Мос­ков­ским Пла­то­ном (Лев­ши­ным; † 1812).

Память: 18 июля (05 июля ст. ст.); 08 октября (25 сентября ст. ст.)

Утвержден для общецерковного использования.

Конда́к 1.

Возбра́нный воево́до во́инов духо́вных, под зна́мением Креста́ во́инствующих на неви́димаго врага́, Се́ргие чудотво́рче: я́ко изба́вльшеся от бе́д твои́ми победоно́сными предста́тельствы, в бра́ни жития́ сего́, похва́льная воспису́ем тебе́ в хвале́ небе́сней торжеству́ющему добропобе́дно: ты́ же я́ко име́я дерзнове́ние к Непобеди́мому Царю́, посо́бствуй хода́тайственно все́м ве́рно призыва́ющим тя́, да́руя побе́ду на ви́димыя и неви́димыя враги́, да зове́м ти́:

Ра́дуйся, преподо́бне чудотво́рче Се́ргие, о́тче на́ш.

И́кос 1.

А́нгелов Творе́ц в Тро́ице Бо́г, сла́вимый от тро́йственных священнонача́лий а́нгельских трисвяты́ми гла́сы, избра́ тя́, преподо́бне Се́ргие, во равноа́нгельное священнослуже́ние Себе́ еще́ от утро́бы ма́терни, в не́йже трикра́ты во вре́мя Святы́я Литурги́и пачеесте́ственно возгласи́л еси́. Те́м я́ко подобноа́нгельному служи́телю Святы́я Тро́ицы, в ра́дости неизрече́нной со а́нгелы водворя́ющемуся, ра́достная приглаша́ем тебе́ си́це:

Ра́дуйся, от чре́ва ма́терня освяще́нный.

Ра́дуйся, в рожде́нии твое́м Варфоломе́й, си́речь сы́н ра́дости нарече́нный.

Ра́дуйся, безпло́тных священнонача́льствию а́нгельским во пло́ти житие́м твои́м подража́вый.

Ра́дуйся, о́гненную в се́рдце твое́м к Бо́гу любо́вь серафи́мски стяжа́вый.

Ра́дуйся, херуви́мски просвеще́нный зна́нием о Бо́зе.

Ра́дуйся, Престо́лу Его́ предста́вый в дерзнове́нии мно́зе.

Ра́дуйся, госпо́дствию ду́ха пло́ть свою́ покори́вый.

Ра́дуйся, си́лу дарова́ния в чудесе́х яви́вый.

Ра́дуйся, име́яй вла́сть проти́вныя вла́сти тмы́ побежда́ти.

Ра́дуйся, нача́льствующих наста́вивый богоуго́дно управля́ти.

Ра́дуйся, арха́нгельски Бо́жия дела́ возвеща́яй.

Ра́дуйся, все́х прибега́ющих к тебе́ от бе́д а́нгельски сохраня́яй.

Ра́дуйся, преподо́бне чудотво́рче Се́ргие, о́тче на́ш.

Конда́к 2.

Ви́дяще стра́нное твое́ воздержа́ние, великочуде́сне Се́ргие, я́ко от дне́ рожде́ния не сса́л еси́ в сре́ду и пято́к, и никакова́ же вкуша́л еси́ млека́: отсю́ду позна́хом тя́, от сосе́ц ма́терних, чудотво́рца и по́стника су́ща. Сего́ ра́ди Бо́га из у́ст младе́нец и ссу́щих хвалу́ соверша́ющаго похваля́юще, зове́м: Аллилу́иа.

И́кос 2.

Ра́зум безчи́сленный подава́я лю́дем Бо́г ра́зумов Госпо́дь, отве́рзе тебе́ у́м разуме́ти писа́ния, Се́ргие преподо́бне, пре́жде ко́сну и неудо́бну ко изуче́нию кни́жныя прему́дрости бы́вшу, да яви́тся, я́ко не от челове́к, но от Бо́га прия́л еси́ ра́зум кни́жный: о не́мже обра́дованный от я́вльшагося тебе́ во о́бразе и́ночестем а́нгела, приими́ от на́с ра́достное пе́ние сие́:

Ра́дуйся, изучи́вый во пе́рвых че́сти сло́во, е́же в нача́ле бе́ у Бо́га.

Ра́дуйся, обреты́й в не́м сокро́вище прему́дрости и ра́зума мно́га.

Ра́дуйся, на хартии́ телесе́ Христо́ва, а́ки пя́ть слове́с, пя́ть я́зв больши́х прочита́вый.

Ра́дуйся, в Писа́нии то́м живо́т ве́чный испыта́вый.

Ра́дуйся, у́м тво́й к Небеси́ чте́нием кни́г боже́ственных воспери́вый.

Ра́дуйся, во творе́нии руку́ Его́ себе́ поучи́вый.

Ра́дуйся, навы́кнувый храни́ти стра́х Бо́жий прему́дрости нача́ло.

Ра́дуйся, все́м соуча́щымся к тебе́ бы́вый доброде́тели зерца́ло.

Ра́дуйся, на скрижа́ли се́рдца своего́ Зако́н Бо́жий написа́вый.

Ра́дуйся, уче́ние сие́ все́м послу́шающым тя́ преда́вый.

Ра́дуйся, ю́ность твою́ в целому́дрии обучи́вый.

Ра́дуйся, я́ко де́ву чи́сту Жениху́ Христу́ себе́ обручи́вый.

Ра́дуйся, преподо́бне чудотво́рче Се́ргие, о́тче на́ш.

Конда́к 3.

Си́ла Вы́шняго осени́, преподо́бне, непоро́чную твою́ ду́шу, в не́йже стра́х Бо́жий заче́нши, и поболе́вши мно́гими труды́, разли́чная искуше́ния и ско́рби му́жественно претерпе́вши, родила́ еси́ ду́х спасе́ния, пою́щи всеси́льному Бо́гу: Аллилу́иа.

И́кос 3.

Имы́й помышле́ние таково́е в себе́, преподо́бне Се́ргие, по сме́рти роди́телей свои́х, я́ко вся́ко умре́ти и́мать, благоразу́мно разсуди́в кра́ткость сея́ жи́зни, разда́л еси́ вся́ оста́вльшая име́ния ни́щым, ничто́же на пропита́ние себе́ оставля́я, ны́не у́бо в присносу́щных бога́тствех безсме́ртныя насыща́яся сла́вы, слы́шиши от на́с такова́я:

Ра́дуйся, любве́ ра́ди Зижди́теля своего́ земна́я к земли́ возврати́вый.

Ра́дуйся, приобре́тения ра́ди Христо́ва, уме́ты вся́ бы́ти вмени́вый.

Ра́дуйся, отверги́й бога́тство, я́ко те́рние подавля́ющее се́мена духо́вныя.

Ра́дуйся, возненави́девый то́, я́ко вещество́ пла́мене грехо́вна.

Ра́дуйся, блаже́нство нищеты́ духо́вныя сподо́бльшийся прия́ти.

Ра́дуйся, восхоте́вый нище́тне вни́ти в Небе́сное Ца́рствие у́зкими враты́, и в простра́нстве ста́ти.

Ра́дуйся, и́го Христо́во благо́е и бре́мя ле́гкое понесы́й измла́да.

Ра́дуйся, не обрати́выйся вспя́ть в ше́ствии до Го́рняго гра́да.

Ра́дуйся, пре́жде кончи́ны твоея́ во умерщвле́ние страсте́й облече́нный.

Ра́дуйся, во умерщвле́нном телеси́ нетле́ния ри́зою украше́нный.

Ра́дуйся, бога́тства неги́блющаго в животе́ ве́чнем облада́телю.

Ра́дуйся, непостижи́мыя сла́вы святы́х созерца́телю.

Ра́дуйся, преподо́бне чудотво́рче Се́ргие, о́тче на́ш.

Конда́к 4.

Бу́ря безме́рная лука́вых духо́в, многоразли́чне тща́шеся препя́ти твоему́, преподо́бне Се́ргие, трудолю́бному житию́: овогда́ бо в зве́ри и зми́и преобразова́хуся, овогда́ же я́ко не́кое во́инство со я́ростию устремля́хуся на тя́ свире́по: ты́ же му́жественно моли́твою себе́ вооружа́я, прогна́л еси́ вся́ и́х бесо́вская по́лчища, не убоя́вся ко́зней и́х, зовы́й Бо́гу: Аллилу́иа.

И́кос 4.

Слы́шаще твое́ терпеливоду́шное в безмо́лвии житие́, преблаже́нне, мно́зи от окре́стных градо́в и стра́н стека́хуся к тебе́ по́льзы ра́ди, ини́и же хотя́ще с тобо́ю жи́ти и наставля́тися от тебе́ на пу́ть спасе́ния: и́хже любе́зно прие́мля, созда́л еси́ к моле́нию це́рковь во и́мя Пресвяты́я Тро́ицы, устроева́я наипа́че сама́го себе́ в жили́ще досто́йно Еди́ному в Тро́ице Бо́гу. Сего́ ра́ди похваля́ем тя́, глаго́люще:

Ра́дуйся, трича́стное души́ твоея́ к Бо́гу Триипоста́сному впери́вый.

Ра́дуйся, Бо́га Отца́ ве́тхаго де́ньми воспомина́нием дре́вних благодея́ний Бо́жиих в па́мяти твое́й носи́вый.

Ра́дуйся, я́ко му́дрость Сы́на, прему́дре о на́с смотре́ние соверши́вшаго, в ра́зуме твое́м сия́ше.

Ра́дуйся, я́ко благода́ть Бо́га Ду́ха Свята́го в во́ли твое́й благи́х хоте́вшей обита́ше.

Ра́дуйся, три́ изря́дныя доброде́тели и́ночества твоего́ же́ртвовавый Тро́ице неле́стно.

Ра́дуйся, отда́вый послуша́ние Бо́гу Отцу́, Ему́же Сы́н послушли́в бе́ да́же до сме́рти кре́стныя.

Ра́дуйся, нищету́ твою́ Бо́гу Сы́ну обнища́вшему на́с ра́ди, в пло́ти твое́й яви́вый смире́нно.

Ра́дуйся, чистоту́ свою́ Свято́му Ду́ху, в чи́стых сердца́х живу́щему, сохрани́вый нетле́нно.

Ра́дуйся, с доброде́тельными твои́ми плоды́ возложи́вый на Бо́га Отца́ ве́ру всеце́лу.

Ра́дуйся, окрила́тевый я́ко оре́л, наде́ждею на Бо́га Сы́на, собира́ющаго на́с ко Своему́ Те́лу.

Ра́дуйся, Бо́га Ду́ха Свята́го, во о́гненных соше́дшаго язы́цех, о́гненною любо́вию возлюби́вый.

Ра́дуйся, и́хже о́ко не ви́де, и у́хо не слы́ша, и на се́рдце челове́ку не взыдо́ша, сия́ от Тро́ицы получи́вый.

Ра́дуйся, преподо́бне чудотво́рче Се́ргие, о́тче на́ш.

Конда́к 5.

Богото́чный исто́чник пресве́тлых чуде́с яви́лся еси́, сла́вне Се́ргие, излива́я благоуго́дных во́д струи́, стремле́нием свои́м веселя́щыя гра́д Бо́жий, оби́тель Пресвяты́я Тро́ицы, па́че же и лице́ всея́ земли́ напая́ющыя оби́льно: отону́ду же вся́к с ве́рою почерпа́я, мно́гая исцеле́ния прие́млет, просла́вльшему тя́ Бо́гу благода́рственно зовы́й: Аллилу́иа.

И́кос 5.

Ви́девше Росси́йстии сы́нове пречу́дное по Бо́зе житие́ твое́, Се́ргие преподо́бне, я́ко и а́ще последи́ ле́ты в новопросвеще́нной стране́ Росси́йстей возра́сл еси́, но дре́вних преподо́бных оте́ц че́сти сподо́бился еси́, дарова́ния чуде́с досто́йно прие́м от Бо́га, того́ ра́ди научи́шася пе́ти тебе́:

Ра́дуйся, Анто́нию Вели́кому равнострада́льне в терпе́нии бесо́вских возста́ний.

Ра́дуйся, Феодо́сию общежи́тельства нача́льнику подобонра́вне, в хране́нии общежи́тельных преда́ний.

Ра́дуйся, Са́вве Освяще́нному во мно́жественном числе́ ученико́в счи́сленный.

Ра́дуйся, Арсе́нию му́жества и́мя нося́щему, в духо́вном му́жестве сравне́нный.

Ра́дуйся, со Иоа́нном Ле́ствичником восхожде́ние в се́рдце свое́м к Небеси́ положи́вый.

Ра́дуйся, с Мака́рием блаже́нство в нетле́нном твое́м телеси́ получи́вый.

Ра́дуйся, Ону́фрию Вели́кому подража́вый житие́м в пусты́ни.

Ра́дуйся, Паи́сию Вели́кому после́довавый во вся́кой святы́ни.

Ра́дуйся, Симео́на Сто́лпника приме́ром высо́кий сто́лп доброде́телей созда́вый.

Ра́дуйся, Па́вла Препро́стаго се́рдца незло́бие во все́м житии́ свое́м показа́вый.

Ра́дуйся, Афана́сию безсме́ртия уча́стниче, не и́менем, но дела́ми.

Ра́дуйся, с Евфи́мием благоду́шным в безконе́чныя весе́лия возше́дый его́же стопа́ми.

Ра́дуйся, преподо́бне чудотво́рче Се́ргие, о́тче на́ш.

Конда́к 6.

Пропове́дует Росси́йский ро́д пресла́вная и неисче́тная твоя́ чудеса́, изрядносла́вне чудотво́рче Се́ргие: ко́ль мно́зи от духо́в нечи́стых изба́влени тобо́ю бы́ша, ко́ль мно́зи от разли́чных неду́гов, бе́д и напа́стей твои́ми спасо́шася моли́твами. Ты́ бо еси́ кре́пкий во бра́нех су́щым помо́щник, боля́щым вра́ч, оби́димым засту́пник: ты́ все́м вся́ моги́й о чудоде́йствующем тобо́ю Христе́, да все́х научи́ши пе́ти: Аллилу́иа.

И́кос 6.

Возсия́ па́че со́лнца воздержа́ние твое́, преподо́бный: егда́ не пеки́йся о бра́шне, е́же не поста́вит на́с пред Бо́гом, ску́дости ра́ди в монастыре́ твое́м, без пи́щи три́ дни́ пребы́вшу бра́тию и во мра́це ско́рби су́щую, озари́л еси́ луча́ми благода́рственнаго терпе́ния, и́стиннаго воздержа́ния и несомне́ннаго упова́ния на Бо́га: от Него́же а́бие оби́льство все́х бла́г твои́ми моли́твами получи́вше, воспе́ша тебе́ си́це:

Ра́дуйся, преподо́бнейший а́лчущих пита́телю.

Ра́дуйся, и духо́внаго насыще́ния тре́бующым пода́телю.

Ра́дуйся, алка́вый и жа́ждавый пра́вды, насыща́яйся же ны́не.

Ра́дуйся, посажде́нный на трапе́зе небе́сней в по́стническом чи́не.

Ра́дуйся, отложи́вый о тле́нной пи́щи попече́ние безме́стно.

Ра́дуйся, испо́лнивый оби́тель свою́ бра́шны принесе́нными безве́стно.

Ра́дуйся, бла́гостию Бо́жиею, а не то́кмо бра́шны, сердца́ на́ша утвержда́яй.

Ра́дуйся, глаго́лом, исходя́щим из у́ст Бо́жиих па́че, не́же хле́бом, насыща́яй.

Ра́дуйся, бра́шно де́лавый пребыва́ющее в живо́т ве́чный, а не бра́шно теле́сно.

Ра́дуйся, в кре́пости я́ди тоя́ ше́ствовавый да́же до Горы́ Небе́сныя.

Ра́дуйся, побежда́яй враги́ на́ша моли́твами твои́ми, я́ко хле́бом ви́денным у Гедео́на.

Ра́дуйся, вкуша́яй хле́ба а́нгельскаго во дво́рех вы́шняго Сио́на.

Ра́дуйся, преподо́бне чудотво́рче Се́ргие, о́тче на́ш.

Конда́к 7.

Хотя́щу преблаже́нному Алекси́ю, Всеросси́йскому па́стырю, от ны́нешняго ве́ка преле́стнаго преста́витися, призва́н бы́л еси́ богоно́сне Се́ргие, да прии́меши по не́м са́н святи́тельства, обруче́ннаго тебе́ от него́ возложе́нием креста́ архиере́йскаго, зла́том и ка́мением украше́ннаго: ты́ же смиренному́дрия люби́теля, не златоно́сца себе́ явля́я, и толи́каго са́на недосто́йна бы́ти вмени́в, смиренному́дренно при кресте́ и́ноческаго терпе́ния твоего́, судьбы́ Госпо́дни вожделе́нныя па́че зла́та и ка́мене че́стна храни́ти восхоте́л еси́, зовы́й Бо́гу: Аллилу́иа.

И́кос 7.

Но́вое не́бо от высоты́ жития́ твоего́ разумева́ем тя́, о́тче, дея́нием и виде́нием, а́ки двема́ заве́сома утвержде́на, неисче́тными же чудесы́ я́ко звезда́ми блиста́юща. Тебе́ кра́сная я́ко луна́ Богоро́дица, со святы́ми апо́столы Петро́м и Иоа́нном, а́ки со заре́ю вече́рнею и денни́цею у́треннею, посеща́ше. Чрез зна́мения у́бо доброде́телей твои́х, пра́вды со́лнце мы́сленное Христо́с Госпо́дь, тече́ние Свое́ творя́, просвеща́ет все́х зову́щих ти́ си́це:

Ра́дуйся, во ю́ности посвяти́вый в же́ртву прия́тну Бо́гови, я́ко юнца́, себе́ сама́го.

Ра́дуйся, сохрани́вый невре́дно целому́дрие де́вства драга́го.

Ра́дуйся, прехожде́нием свои́м в пусты́нях мно́гия оби́тели насади́вый.

Ра́дуйся, чудотво́рных во́д, от Бо́га умоле́нием, че́рплющих все́х наслади́вый.

Ра́дуйся, возмоги́й рыка́ющаго диа́вола, я́ко льва́ му́жественно победи́ти.

Ра́дуйся, с се́ю побе́дою удосто́ивыйся во врата́ сла́вы торже́ственно вни́ти.

Ра́дуйся, навы́кнувый кро́тости от А́гнца, взе́млющаго вся́ зла́я.

Ра́дуйся, я́ко за соблюде́ние пра́вды получи́л еси́ ве́чная блага́я.

Ра́дуйся, щито́м ве́ры угаси́вый вся́ разжже́нная лука́ваго стре́лы.

Ра́дуйся, сокруши́вый се́дмь гла́в зло́бы а́дскаго зми́я, се́дмь грехо́в сме́ртных проти́вными благи́ми де́лы.

Ра́дуйся, совоку́плену име́яй любо́вь к Бо́гу и бли́жним.

Ра́дуйся, источа́яй от ра́ки своея́ цельбы́ в по́льзу на́м ни́жним.

Ра́дуйся, преподо́бне чудотво́рче Се́ргие, о́тче на́ш.

Конда́к 8.

Стра́нное и ужа́сное виде́ние ви́де Моисе́й Богови́дец, я́ко купина́ горя́щи, и не сгара́ше: ужа́снаго сподо́бися виде́ния и учени́к тво́й Си́мон, егда́ служа́щу ти́ Боже́ственную Литурги́ю, ви́де невеще́ственный о́гнь, осеня́ющь олта́рь и окружа́ющь свяще́нную трапе́зу: тебе́ же, преподо́бне Се́ргие, от главы́ до ногу́ во огни́ стоя́щу, и те́м соше́дшим, а́ки плащани́ца, во Святу́ю Ча́шу, небе́сным прича́щшагося огне́м, Бо́г бо на́ш о́гнь е́сть пояда́яй: оба́че тя́ не опали́, но па́че просвети́, во е́же пе́ти: Аллилу́иа.

И́кос 8.

Ве́сь ро́д Росси́йский, воеди́но совоку́пленный, не возмо́жет благода́рственнаго возда́ти похвале́ния предста́тельству твоему́, достохва́льне Се́ргие: не то́чию бо бли́з притека́ющих к цельбоно́сному твоему́ гро́бу, но и дале́че отстоя́щих, и призыва́ющих всечестно́е твое́ и́мя, те́плым твои́м предста́тельством защища́еши и храни́ши от вся́каго зла́. Ели́ко у́бо возмо́жно благода́рствующе похваля́ем тя́ таковы́ми гла́сы:

Ра́дуйся, служи́телю Бо́жий о ве́рных умоля́яй.

Ра́дуйся, наста́вниче гре́шных к Небеси́ направля́яй.

Ра́дуйся, души́ бе́дствующия и те́ла многомо́щный храни́телю.

Ра́дуйся, оскорбля́емым те́плый покрови́телю.

Ра́дуйся, предводи́телю до́брый в пу́ть спасе́ния теку́щым.

Ра́дуйся, защи́тителю до́брый во бра́ни ми́ра су́щым.

Ра́дуйся, цели́телю изя́щный боле́зни душе́вной и теле́сной.

Ра́дуйся, просвети́телю чу́дный обою́ тмы́ оче́сной.

Ра́дуйся, посети́телю ско́рый в не́мощи лежа́щым.

Ра́дуйся, уте́шителю му́дрый в беда́х слезя́щым.

Ра́дуйся, пособи́телю кре́пкий во́ем христиа́нским.

Ра́дуйся, прогони́телю стра́шный по́лчищем пога́нским.

Ра́дуйся, преподо́бне чудотво́рче Се́ргие, о́тче на́ш.

Конда́к 9.

Вся́кую стяжа́л еси́ чудоде́йствия си́лу, благода́тию ди́внаго во святы́х Свои́х Бо́га, всебога́те Се́ргие: не то́кмо бе́сы от челове́к ды́мом моли́тв твои́х прогна́л еси́, я́ко Рафаи́л; прокаже́нныя очи́стил еси́, в пролия́нии пред Бо́гом сле́з, я́ко во Иорда́не Елиссе́й; плене́нныя от ва́рвар, ско́ро предвари́в освободи́л еси́, я́ко Никола́й Чу́дный; уме́ршаго же о́трока воскреси́в, животворя́щему ме́ртвыя, и зову́щему не су́щая, я́ко су́щая, Бо́гу, о все́х пресла́вных твои́х чудотворе́ниих созыва́л еси́ все́х воспе́ти: Аллилу́иа.

И́кос 9.

Вети́я суему́дренныя отсту́пническия обличи́л еси́, предста́в во сне́ пресви́теру Симео́ну, не низпа́дшему в злоче́стие тщесо́вестное и по преставле́нии твое́м отве́рженное от тебе́: те́мже вси́ и́стинная Восто́чныя Святы́я Це́ркве ча́да иму́ще тя́ столпа́ церко́внаго в ве́ре непоколеби́ма, ублажа́ют си́це:

Ра́дуйся, злосла́вное отсту́пническое любому́дрие укори́вый.

Ра́дуйся, правове́рных благоче́стие уясни́вый.

Ра́дуйся, и́стинныя прему́дрости содержа́вый догма́ты.

Ра́дуйся, научи́вый не пре́нием, но ве́рою возмога́ти.

Ра́дуйся, обличи́вый отступле́ние ве́ры, я́ко все́м злы́м вино́вно.

Ра́дуйся, правове́рных в преда́нии святы́х оте́ц утверди́вый богосло́вно.

Ра́дуйся, не благоволи́вый в злове́рных многоглаго́ланию вре́дному.

Ра́дуйся, упраздни́вый те́х великому́дрствие о благоре́чии тще́тном.

Ра́дуйся, не вне́шними словесы́, но Бо́жиим свиде́тельством вооруже́нный.

Ра́дуйся, на ка́мени краеуго́льном Христе́, неподви́жимою ве́рою утвержде́нный.

Ра́дуйся, благоче́стно тече́ние сконча́вый, и ве́ру соблюды́й нескве́рну.

Ра́дуйся, в венце́ пра́вды предста́вый Све́ту невече́рню.

Ра́дуйся, преподо́бне чудотво́рче Се́ргие, о́тче на́ш.

Конда́к 10.

Спасе́ния ра́ди хотя́щему ученику́ твоему́ Исаа́кию молчали́вое храни́ти житие́, и прося́щему на се́ у тебе́ благослове́ния, повеле́л еси́ приити́ во вре́мя Боже́ственныя Литурги́и ко олтарю́, иде́же егда́ благословля́л еси́ его́, ви́де о́н а́ки не́кий вели́к пла́мень изше́д от руку́ твое́ю, чудотво́рче, и прикосну́вшийся ему́, я́ко клеще́ю о́гнь от олтаря́ взе́мшею, благословя́щею твое́ю руко́ю: се́ же бы́сть ему́ к потребле́нию неключи́маго праздносло́вия, к утвержде́нию же в безстра́стном молча́нии с Серафи́мы пе́ти Бо́гу: Аллилу́иа.

И́кос 10.

Стена́ вели́ка и высо́ка, иму́щая основа́ний двана́десять неподви́жимых догма́т Правосла́вныя на́шея ве́ры, ты́ еси́, адамантоду́шне Се́ргие, остеня́я велеле́потне пречестну́ю свою́ оби́тель, а́ки гра́д вели́кий святы́й Иерусали́м, низше́дый ро́ссом с небесе́, от Бо́га иму́щь сла́ву Бо́жию в чудесе́х твои́х, и украше́ние вся́ким драги́м ка́мением многоце́нных твои́х моли́тв, и́миже остеня́еши все́х зову́щих ти́ си́це:

Ра́дуйся, преподо́бне, я́ко иа́спис пресве́тлейший, во все́й подсо́лнечной сия́яй чуде́сно.

Ра́дуйся, я́ко сапфи́р невообра́зный, блиста́яй на́м житие́ поднебе́сно.

Ра́дуйся, я́ко халкидо́н углеви́дный, огне́м любве́ Бо́жия разжже́нный.

Ра́дуйся, я́ко смара́гд зелене́ющий, присновесе́нним венце́м увязе́нный.

Ра́дуйся, я́ко сардо́никс, но́гтя нечу́вственнаго цве́т имы́й, умерщвле́ние страсте́й подава́яй.

Ра́дуйся, я́ко са́рдий, я́звы от желе́за целя́щий уя́звленных на бра́ни, ве́рных чудотво́рне исцеля́яй.

Ра́дуйся, я́ко хрисоли́ф златосветя́щий, многоце́нными доброде́тельми блиста́яй.

Ра́дуйся, я́ко вири́лл, нося́й морски́й ви́д, пла́вающих в мо́ри безбе́дно управля́яй.

Ра́дуйся, я́ко топа́зий цельбоно́сный, исцеля́яй слепоту́ душе́вную и теле́сную.

Ра́дуйся, я́ко хрисопра́с надзлатоя́снейший, получи́вый добро́ту небе́сну.

Ра́дуйся, я́ко яки́нф воздухови́дный, на возду́се восхище́н бы́ти гото́в во сре́тение Госпо́дне.

Ра́дуйся, я́ко амефи́ст огнесве́тлый, пожига́яй бесо́в мно́жество преиспо́дне.

Ра́дуйся, преподо́бне чудотво́рче Се́ргие, о́тче на́ш.

Конда́к 11.

Пе́ние вся́кое побежда́ется, звездочи́сленными твои́ми труды́, всеблаже́нне Се́ргие: кто́ бо от земноро́дных просла́вит жесто́кое твое́ житие́; кто́ возвели́чит свяще́нныя по́двиги твоя́; безмо́лвие соверше́нное, смире́ние нелицеме́рное, по́ст протяже́нный, моли́тву непреста́нную, чистоту́ по вну́треннему и вне́шнему челове́ку; за ня́же сподо́бился еси́ со все́ми без поро́ка после́дующими А́гнцу, и благоуго́дне подвиза́вшимися, пе́ти: Аллилу́иа.

И́кос 11.

Светоза́рным све́том блиста́ет оби́тель твоя́, всесве́тлый чудотво́рче, изне́сши от земна́го покрове́ния сия́ющыя чудеса́ми нетле́нныя мо́щи твоя́, и поста́вльши и́х я́ко свети́льник на ме́сте досто́йне, да испо́лнится рече́ние Госпо́дне: «Не вжига́ют свети́льника, и под спу́дом не полага́ют, но на све́щник поставля́ют, да входя́щии ви́дят». Те́мже вси́ в хра́ме твое́м, и везде́ тобо́ю просвеща́еми, дерза́ем глаго́лати тебе́:

Ра́дуйся, све́щниче трича́стный, треми́ светле́йшими богосло́вскими доброде́тельми светя́щий.

Ра́дуйся, свети́лниче дво́йственный, любо́вию ко Бо́гу и бли́жнему горя́щий.

Ра́дуйся, его́же сугубоесте́ственный Архиере́й, проше́дый небеса́, в служе́ние Свое́ небе́сное поста́ви.

Ра́дуйся, его́же стоя́й посреде́ седми́ свети́лник, я́ко еди́наго от те́х Себе́ предста́ви.

Ра́дуйся, свети́лниче, дара́ми Ду́ха Свята́го седмоосвяще́ный, я́ко ви́денный Заха́риею проро́ком.

Ра́дуйся, во свете́ние чуде́сное поста́вленный в Росси́и на ме́сте высо́ком.

Ра́дуйся, свети́лниче превознесе́ннейший, па́че све́та освеща́ющий пла́вающих в мо́ри.

Ра́дуйся, свете́нием твои́м наставля́яй препла́вати от ми́ра к небеси́ вско́ре.

Ра́дуйся, свети́лниче мы́сленный, светя́щий святы́нею, па́че поста́вленнаго Соломо́ном, во Святы́х Свята́я.

Ра́дуйся, блиста́нием чуде́с твои́х во вся́ концы́ земли́ сия́я.

Ра́дуйся, уме́рый ми́ру, жи́в же Бо́гови, ме́ртвому о́троку дарова́вый жи́ти.

Ра́дуйся, живы́й во ве́ки со Христо́м, с Ни́мже и на́м моли́ бы́ти.

Ра́дуйся, преподо́бне чудотво́рче Се́ргие, о́тче на́ш.

Конда́к 12.

Благода́ть Бо́жию испове́дав дре́вле Маккаве́й, егда́ гряду́щу ему́ с во́инством на супоста́ты, яви́ся предводя́й и́х ко́нник в оде́жде бе́ле, укрепля́я те́х и му́жественны творя́. Ра́вное возсыла́ет благода́рствие пресла́вная оби́тель чудотво́рца Се́ргиа, от облежа́щих ю́ враго́в изба́вленная, явле́нием преподо́бнаго ста́рца е́здяща, и иму́ща в руце́ свое́й ме́ч обнаже́н: его́же по́мощию хра́брственно изше́дше су́щии во обстоя́нии, победи́ша сопроти́вныя, ублажа́юще спобо́рствующаго и́м чудотво́рца, и вопию́ще Бо́гу: Аллилу́иа.

И́кос 12.

Пою́ще твое́ успе́ние, преподо́бне о́тче, Росси́йстии твоя́ ча́да, прославля́ем Пода́теля все́х благи́х Бо́га, дарова́вшаго на́м тебе́, такова́го отца́, и́же и по преставле́нии твое́м не оставля́еши на́с, но благода́тными чуде́с дарова́нии всегда́ призира́еши, посеща́еши, и заступа́еши: Ему́же надгро́бное соверша́юще пе́ние, ублажа́ем достопа́мятное твое́ житие́ любе́зным воспомина́нием, и па́ки совоку́пне си́м:

Ра́дуйся, в че́сть Святы́я Тро́ицы трикра́ты во утро́бе ма́терней стра́нно возгласи́вый.

Ра́дуйся, в па́мять Христо́вых страсте́й, сре́ду и пято́к пости́выйся.

Ра́дуйся, име́ние свое́ к Небеси́ рука́ми ни́щих предпосла́вый.

Ра́дуйся, в нищете́ душе́вной и теле́сной безпеча́лно в пусты́ни обита́вый.

Ра́дуйся, претерпе́вый бесо́вская наважде́ния преизли́шше.

Ра́дуйся, созда́вый оби́тель Святе́й Тро́ице тро́ическою по́мощию свы́ше.

Ра́дуйся, чуде́сных во́д от Бо́га умоле́нием напо́лнивый оби́тели твоея́ огра́ду.

Ра́дуйся, бра́шны неви́димо принесе́нными а́лчной бра́тии сотвори́вый отра́ду.

Ра́дуйся, невосхоте́вый прия́ти святи́тельския вла́сти, одея́ния и украше́ния теле́сна.

Ра́дуйся, во вре́мя литургиса́ния твоего́, оде́янный пла́менем огня́ Небеси́.

Ра́дуйся, свети́лниче, еле́ем ми́лости кипя́й.

Ра́дуйся, на све́щнице сла́вы небе́сныя горя́й.

Ра́дуйся, преподо́бне чудотво́рче Се́ргие, о́тче на́ш.

Конда́к 13.

О вели́кий чудотво́рче Се́ргие всеблаже́нне, преизря́днейший Росси́йския страны́ храни́телю! Приими́ смире́нно приноси́мое тебе́ моле́ние, и твои́м у Небе́снаго Царя́ предста́тельством сохрани́ и поми́луй Оте́чество на́ше от вра́г ви́димых и неви́димых, и от вся́ких скорбе́й, бе́д и напа́стей, и исхода́тайствуй в Небе́сном Ца́рствии все́м приле́жно моля́щимся, с тобо́ю пе́ти: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц в Тро́ице Бо́г, сла́вимый от тро́йственных священнонача́лий а́нгельских трисвяты́ми гла́сы, избра́ тя́, преподо́бне Се́ргие, во равноа́нгельное священнослуже́ние Себе́ еще́ от утро́бы ма́терни, в не́йже трикра́ты во вре́мя Святы́я Литурги́и пачеесте́ственно возгласи́л еси́. Те́м я́ко подобноа́нгельному служи́телю Святы́я Тро́ицы, в ра́дости неизрече́нной со а́нгелы водворя́ющемуся, ра́достная приглаша́ем тебе́ си́це:

Ра́дуйся, от чре́ва ма́терня освяще́нный.

Ра́дуйся, в рожде́нии твое́м Варфоломе́й, си́речь сы́н ра́дости нарече́нный.

Ра́дуйся, безпло́тных священнонача́льствию а́нгельским во пло́ти житие́м твои́м подража́вый.

Ра́дуйся, о́гненную в се́рдце твое́м к Бо́гу любо́вь серафи́мски стяжа́вый.

Ра́дуйся, херуви́мски просвеще́нный зна́нием о Бо́зе.

Ра́дуйся, Престо́лу Его́ предста́вый в дерзнове́нии мно́зе.

Ра́дуйся, госпо́дствию ду́ха пло́ть свою́ покори́вый.

Ра́дуйся, си́лу дарова́ния в чудесе́х яви́вый.

Ра́дуйся, име́яй вла́сть проти́вныя вла́сти тмы́ побежда́ти.

Ра́дуйся, нача́льствующих наста́вивый богоуго́дно управля́ти.

Ра́дуйся, арха́нгельски Бо́жия дела́ возвеща́яй.

Ра́дуйся, все́х прибега́ющих к тебе́ от бе́д а́нгельски сохраня́яй.

Ра́дуйся, преподо́бне чудотво́рче Се́ргие, о́тче на́ш.

Конда́к 1.

Возбра́нный воево́до во́инов духо́вных, под зна́мением Креста́ во́инствующих на неви́димаго врага́, Се́ргие чудотво́рче: я́ко изба́вльшеся от бе́д твои́ми победоно́сными предста́тельствы, в бра́ни жития́ сего́, похва́льная воспису́ем тебе́ в хвале́ небе́сней торжеству́ющему добропобе́дно: ты́ же я́ко име́я дерзнове́ние к Непобеди́мому Царю́, посо́бствуй хода́тайственно все́м ве́рно призыва́ющим тя́, да́руя побе́ду на ви́димыя и неви́димыя враги́, да зове́м ти́:

Ра́дуйся, преподо́бне чудотво́рче Се́ргие, о́тче на́ш.

 

 

    

Добавить комментарий

Ваш e-mail не будет опубликован. Обязательные поля помечены *