Собор 12 апостолов


Собор 12  апостолов

Собор  12  апостолов,  правильнее  говоря  собор  святых  славных  и  всехвальных  12-ти  апостолов  Христовых,  является  древним  праздником.  Церковь  празднует  собор  70  апостолов,  празднует  память  первоверховных  апостолов  Петра  и  Павла,  а  на  следующий  день  собор  12  апостолов,  празднует  и  чтит  память  каждого  из  двенадцати  апостолов  отдельно.

По  роду  служения  своего  они  Самим  Господом  наименованы  были  апостолами  (см.: Лк.  6,  13),  то  есть  посланниками.  После  крещения  от  Иоанна  Предтечи  на  реке  Иордан  Господь  Иисус  Христос  начал  проповедовать  Свое  Божественное  учение,  творя  бесчисленные  чудеса  и  исцеляя  всякие  болезни  (Мф.  4,  23).

Многие  приходили  слушать  его  дивное  учение,  восхищались  чудесами,  просили  исцеления  от  недугов  и…  возвращались  к  своим  делам.  Некоторые  же  следовали  за  Ним,  сопровождали  Спасителя  почти  всюду  и  именовались  уже  Его  учениками  (Ин.  3,  22;  4,  1).  Но  они  также  не  все  были  готовы  к  восприятию  Божественных  истин.

Иисусу  Христу  предстояло  выступить  решительно  и  открыто  на  Свое  славное  служение  роду  человеческому,  и  Ему  угодно  было  из  числа  учеников  отделить  нескольких  избранных.  Еще  раньше  Господь  призвал  их  порознь  для  следования  за  Собою,  для  испытания  их  готовности.  Испытав,  Он  вознамерился  положить  начало  теснейшему  союзу  их  с  Собою.

Проведя  всю  ночь  в  молитве,  Божественный  молитвенник  (Лк.  6,  12)  призывает  к  Себе  на  гору  учеников  Своих  и  здесь  вдали  от  мирской  суеты  избирает  из  них  двенадцать.  Вот  их  имена:  Симон  Петр  и  Андрей,  брат  его;  Иаков  и  Иоанн,  сыновья  Зеведея;  Филипп  и  Варфоломей;  Матфей  и  Фома;  Иаков  Алфеев  и  Симон  Зилот;  Иуда  Иаковлев  и  Иуда  Искариот,  который  потом  предал  Христа  (Лк.  6,  14-16,   Мк.  3,  16-19)

Все  это  большей  частью  были  люди  простые,  малообразованные,  бедные  галилейские  рыбаки.  Господь  избрал  их  как  доказавших  свою  любовь  и  привязанность  к  Нему,  доверчивых  как  детей,  не  зараженных  мечтами  ложного  просвещения.  Он  их  обучал  словом  и  делом,  одних  и  перед  народом,  дома  и  в  пути,  на  суше  и  на  море.

Господь  очищал  и  просвещал  их  ум  и  сердце,  приготовляя  их  к  полнейшему  излиянию  в  них  Духа  истины  и  освящения.  Они  постоянно  были  при  Нем  (Мк.  3,  14),  повсюду  сопровождали  Его,  были  всегдашними  Его  спутниками  и  собеседниками,  слушали  Его  учение,  были  свидетелями  Его  жизни  и  деятельности,  Его  чудес,  Его  страданий,  смерти,  воскресения  и  вознесения  на  Небо  и  имели  сами  потом  свидетельствовать  о  том,  что  видели,  слышали,  осязали.

Сначала  они  были  в  отношении  к  Господу  как  ученики.  В  конце  Своего  земного  поприща  Он  называл  их  уже  друзьями  (Ин.  15,  14-15),  такими,  от  которых  Он  ничего  не  скрывал.  По  воскресении  Своем  Он  наименовал  их  братьми  (Ин.  20,  17),  самыми  близкими  к  Себе  существами,  а  затем  по  роду  служения  их  назвал  их  апостолами.

Двухкратно  Христос  Спаситель  посылал  их  на  проповедь.  Сначала,  дав  им  власть  творить  чудеса,  послал  их  по  двое  пред  лицом  Своим  только  к  погибшим  овцам  дома  Израилева  (Мф.  10,  6;  Мк.  6,7).  Потом,  после  смерти  и  славного  воскресения,  послал  их  проповедовать  Евангелие  всей  твари  (Мк.  16,  15),  научить  все  народы,  крестя  их  во  имя  Отца  и  Сына  и  Святого  Духа  (Мф.  28,  19).

Число  12  апостолов  было  нарушено  отпадением  Иуды  (Искариота)  после  его  предательства.  По  вознесении  Христа  оно  было  восполнено  избранием  по  жребию  Матфия  (Деян.  1,  20,  23-26).  В  день  Пятидесятницы  апостолы  прияли  Духа  Святого,  нисшедшего  в  виде  огненных  языков  и  почившего  на  них  Своею  благодатью  (Деян.  2,  1-4).

По  сошествии  уже  Святого  Духа,  по  непосредственному  призванию  Христа  и  озарению  Духа  Святого,  к  лику  12  апостолов  был  присоединен  Павел,  великий  апостол  язычников  (Рим.  11,  13;  15,  14-19).  Исполняя  повеление  Господне,  святые  апостолы,  чрез  12  лет  по  вознесении  Христа,  которые,  по  церковному  преданию,  они  пребывали  вместе  в  Иерусалиме,  разошлись  и  везде  проповедовали  имя  Христово  (Деян. 16,  21;  Мк.  16,  20).

Собор  12  апостолов

По  всей  земле  раздался  голос  их,  и  до  края  вселенной  разнеслись  слова  их  (Рим.  10,  18).

Празднование:  Собор  12  апостолов  празднуется  30  июня  /  13  июля.  Указание  на  то,  что  собор  12  апостолов  праздновался  древней  Церковью  относится  к  IV  веку.  Святой  равноапостольный  Константин  Великий  построил  в  Царьграде  храм  во  имя  святых  12  апостолов.

Тропарь  Собору  славных  и  всехвальных  12-ти  апостолов,  глас  4

Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Перевод: Первенствующие из Апостолов и вселенские учителя, Владыку всего молите мир вселенной даровать и душам нашим великую милость.

Кондак  Собору  славных  и  всехвальных  12-ти  апостолов,  глас  2

Ка́мень Христо́с ка́меня ве́ры прославля́ет све́тло,/ ученико́в преизря́дна,/ и с Па́влом весь дванадесяточи́сленный собо́р днесь;/ и́хже па́мять соверша́юще ве́рно,// сих Просла́вльшаго прославля́ем.

Перевод: В сей день Камень – Христос прославляет торжественно камень веры, – превосходнейшего из учеников, и с Павлом весь двенадцатичисленный сонм, чью память совершая с верою, мы их Прославившего прославляем.

Ин  кондак  Собору  славных  и  всехвальных  12-ти  апостолов,  глас  2

Петра́, ве́рнии, ка́меня ве́ры, похва́лим/ и Па́вла Богому́драго,/ созыва́ют бо всех пра́здновати ве́рою,/ собо́рне вку́пе вся двана́десяте, я́ко пропове́дники ве́ре,// прося́ща грехо́в оставле́ния.

Молитва 

Влады́ко всемогу́щий, Го́споди Бо́же наш, избра́вый возлю́бленныя Своя́ ученики́ и Апо́столы на про́поведь спасе́ния всему́ ми́ру, да́вый им власть отпуща́ти грехи́, приими́ хода́тайства их о ро́де челове́ческом, его́же и суди́ти с ни́ми и́маши, тех са́мых, я́ко друго́в Твои́х, нам зело́ че́стных, дерза́ем, недосто́йнии, в предста́тельство к Тебе́, многопоспешеству́ющее ко спасе́нию душ на́ших, приводи́ти, моля́щи их усе́рдно. Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием Креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси святи́и Богоизбра́нии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели, помози́те нам мо́щным ва́шим пред Го́сподом хода́тайством, изба́витися от вся́каго зла и вра́жия ле́сти, тве́рдо сохраня́ти преда́нную ва́ми ве́ру Правосла́вную, в не́йже ва́шим предста́тельством ни ра́нами, не преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́ и да сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емего Бо́га, ны́не и при́сно и во ве́ки веко́в. Ами́нь.

АКАФИСТ    12   АПОСТОЛАМ

Тропарь, глас 3

Апостоли святии, молите милостиваго Бога, да прегрешений оставление подаст душам нашим.

 

Кондак, глас 2

Твердыя и боговещанныя проповедатели, верх Апостолов Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, Едине сведый сердечная.

 

Кондак 1

Избраннии самовидцы и свидетелие Слова воплощения, мира ловцы и сосуди Христовы благодати, Церкве пресветлыя звезды, вселенныя светильницы и проповедницы веры, яко лучами блистающии зарями духовными, всечестная двоенадесятице ученик Спаса Христа Бога, светоносную и преблаженную память вашу благочестно творим ныне. Вы же, яко Божественнаго света причастницы и дерзновение ко Христу имущии, молитеся Ему прилежно, да к свету богоразумия нас всех истинно наставит, в вере твердей укрепит и в мире глубоце соблюдет зовущих вам: Радуйтеся, Апостолов двоенадесятице, мира концы учением Христовым просветившии.

 

Икос 1

Ангельскую службу воплощенному нас ради Божественному Слову приносяще, вселенную всю обтекосте, святии Апостоли, яко богопосланнии вестницы грядущаго миру спасения. Темже словом истины Христовы от словес ваших озареннии и благодатию Святаго Духа спасеннии чрез веру, вси концы мира от дний древних и до днесь немолчно восхваляют вас сице:

Радуйтеся, вселенныя светильники.

Радуйтеся, благославнии трубы.

Радуйтеся, твердыя веры проповедники.

Радуйтеся, учений небесных благовещаннии сказатели.

Радуйтеся, церковнии столпи.

Радуйтеся, разорители идольския лести.

Радуйтеся, избраннии понести пред языки Божественное имя.

Радуйтеся, Апостолов двоенадесятице, мира концы учением Христовым просветившии.

 

Кондак 2

Видяще Господа Славы, в зраке раба во плоти пришедшаго, и слышавше Того Предтечею свидетельствуема Агнца Божия быти, грех мира вземлющаго, вся в мире оставльше, вслед Того устремистеся, согласно вси поюще тако изволившему о вас Богу: Аллилуиа.

 

Икос 2

Разумнаго восхождения от дольних на горняя явили есте образ, богомудрии Апостоли, егда домы, братию и имения своя во уметы вменили есте и востекли, себе отвергшеся, стезею правою к тесным вратом Царствия Христова. Того ради достойно слышите от всех сицевая:

Радуйтеся, вина раствореннаго премудростию Божией на трапезе духовней полезно вкусившии.

Радуйтеся, губительное безумие жизни привременныя, по гласу, вы звавшему, без сумнения всякаго оставльшии.

Радуйтеся, сокровище духовное на селе при пути вашем обретшии.

Радуйтеся, бисера добраго мыслию сердца вашего искавшии.

Радуйтеся, на рало Христово руце ваша несумнительно и твердо волею своею возложшии.

Радуйтеся, Апостолов двоенадесятице, мира концы учением Христовым просветившии.

 

Кондак 3

Силою свыше укрепленнии, всемудрии Апостоли, благоразумием вашим и огнем духовным всякую вражию прелесть попаливше, человеческий род верою просветили есте; темже молим вы: омраченныя грехми души наша просветите, да воспрянем еже пети Богу: Аллилуиа.

 

Икос 3

Имуще премудрость вселенную всю словом спасительным просветити, озарили есте во тьме и сени смертней седящия люди; просветите убо и наши души, омраченныя мраком страстей, да восхвалим вас тако:

Радуйтеся, светильницы востока мысленнаго, тьму неразумия прогнавшии верою.

Радуйтеся, напоившии землю струями Божественных вещаний.

Радуйтеся, живоносным током словес Христовых орошающии нас, бедствующих зноем скорбей.

Радуйтеся, возбраняющии лукавым помыслом омраченнаго сердца нашего.

Радуйтеся, мрежею благодати из глубины потопляющих нас сует мира сего любовию всех с верою взирающих к вам возводящии.

Радуйтеся, Апостолов двоенадесятице, мира концы учением Христовым просветившии.

 

Кондак 4

Бурею внутреннею и волнами морскими иногда в корабли обуреваеми, святии Апостоли, ко Христу вопиясте: «Учителю, спаси ны, погибаем!» Приявше же Того всемогущую помощь, явистеся по благодати, вам данней, сами всех кормчии, к благотишному пристанищу надежно приводящии. И нас, в пучине зол бедне мятущихся и напастьми житейскими присно колеблемых, управите ко брегу безстрастия, идеже всеми спасаемыми поется Богу: Аллилуиа.

 

Икос 4

Слышавше от Пастыреначальника и Господа вашего призывающее слово: «Жатва убо многа, делателей же мало; молитеся убо Господину жатвы, яко да изведет делатели на жатву Свою», исполнишася, блаженнии Апостоли, огнепальною ревностию сему делу Христову послужити, благословеннии на подвиг сей, обтекосте грады и веси многия, благовествующе Евангелие Царствия, исцеляя всяк недуг и всяку язю в людех. Умолите убо, яко вратарие Божественнаго Царствия, и нам спасение обрести, со умилением зовущим вам тако:

Радуйтеся, добрии вестницы Христовы, сослужебницы мысленным чином.

Радуйтеся, иже от рыбарей умудреннии паче риторов.

Радуйтеся, трубы Христовы благогласнии, ко пристанищу спасения вся привлекшии.

Радуйтеся, Пастыря добраго богоизбранныя овцы, волков мысленных во овчую кротость верою преложившии.

Радуйтеся, уста огнедухновенныя Христовы, от уст имущаго поглотити нас врага избавляющии.

Радуйтеся, Апостолов двоенадесятице, мира концы учением Христовым просветившии.

 

Кондак 5

Боготечныя звезды, светлостьми Божественных добродетелей сияющии, явистеся, всехвальнии Апостоли, яко солнце, земныя концы обновисте. Светлым блистанием вашим убо и нас озарите и страстей избавите всех вопиющих Богу: Аллилуиа.

 

Икос 5

Видевше, Апостоли святии, во образе человечестем Владыку мира и Сына Божия, усты первоверховнаго Апостола Петра Христа проповедасте, и Той яко откровение Отчее исповедание ваше приемый. Сего ради и мы, во исповедании вашем утвердившеся, ублажаем вас тако:

Радуйтеся, богоозареннии исповедницы неизреченныя Божественныя славы воплотившагося Слова.

Радуйтеся, с небес приемшии благодать богословия Христова.

Радуйтеся, мир вещании вашими соблюдшии.

Радуйтеся, яко от Самаго Господа ублажени бысте во исповедании вашем.

Радуйтеся, яко от Него приясте Божественную власть вязати и решити грехи человеков.

Радуйтеся, Апостолов двоенадесятице, мира концы учением Христовым просветившии.

 

Кондак 6

Проповедание Владыки и Господа своего, яко подобает Ему много во Иерусалиме пострадати от старец, и архиерей, и книжник, и убиену быти, слышавше, дивистеся зело, недоумеюще, како сбудутся Писания о славе и чести Сына Человеческаго. Вразумленнии же, яко не человеческою мыслию, но неисповедимою волею Отца Небеснаго путие вси в мире исправляются, научистеся смиренно пети Богу, благоволившему тако о Сыне Своем: Аллилуиа.

 

Икос 6

Возсия солнца светлее на Фаворстей горе слава Божественнаго зрака Христова пред вами, святии Апостоли, онем убо избранным, на гору совозшедшим. Темже Моисея и Илию видевше, во облак светел вшедшия, и глас Отчаго свидетельства о Единороднем Сыне с небес слышавше, толикия благодати небеснаго озарения сподобльшимся, усердно возглашаем сице:

Радуйтеся, в неприступнем свете Христа на Фаворе облиставшася зревшии.

Радуйтеся, от Отца свидетельствуема Сына Божия слышавшии.

Радуйтеся, Моисея и Илию, явльших Христово Божество, на горе славы сретившии.

Радуйтеся, беседою тех о исходе Христа, во Иерусалиме быти хотящем, просвещеннии.

Радуйтеся, премирныя славы Христовы сообщницы.

Радуйтеся, Апостолов двоенадесятице, мира концы учением Христовым просветившии.

 

Кондак 7

Хотя душепитательную уготовати миру трапезу Животворящаго Тела и Крове Cвоея Господь всех и Зиждитель, предъизобрази всесвятое Свое заколение и безсмертия Чашу в проповедании о Хлебе жизни вечныя, и егда мнози слышавшии слово сие роптаху и блазняхуся и вспять идяху от Христа, вы, Апостоли блаженнии, усты Симона Петра единомысленно рекосте: «Господи, к кому идем? Глаголы живота вечнаго имаши, и мы веровахом и познахом, яко Ты еси Христос, Сын Бога Живаго». Сие исповедание ваше ублажающе, тепле припадем ныне к Богу, поя Ему: Аллилуиа.

 

Икос 7

Новыя Божественныя Пасхи, не от Египта, но от Сиона грядущия, причаститися сподобистеся, богоблаженнии Апостоли, и омысте нозе ваша от препоясаннаго лентием Владыки, смирения образ тем явившаго, собеседницы на Вечери Тайней Христа Господа бысте. Темже величаем вас сице:

Радуйтеся, в горницу Сионскую, яко под сень небесную, вшедшии.

Радуйтеся, честнаго омовения от Владыки Христа сподобленнии.

Радуйтеся, заповедь Господню: да будет последним хотяй первым быти — из уст Учителя вашего приемшии.

Радуйтеся, Безкровныя Жертвы и словесныя службы великим Архиереем Завета Новаго, за весь мир приносимыя, участницы.

Радуйтеся, руками чистыми и усты нескверными Хлеб жизни и веселия Божественнаго Чашу от рук Тайновершителя Господа вземшии.

Радуйтеся, Апостолов двоенадесятице, мира концы учением Христовым просветившии.

 

Кондак 8

Странное вещание своего Учителя и Господа, яко един от вас предатель имать быти, слышавше, смутистеся, святии Апостоли, и скорбию и страхом одержими, «кто есть сей?» Учителя вопрошасте. Егда же по малем часе сбытие слова сего страшнаго в сыне погибельнем яве открыся, духом сокрушенным принесосте Богу псалом: Аллилуиа.

 

Икос 8

Весь закон и пророцы, яже о Христе преднаписаша, того исполнение в честных страданиих, погребении, предивном востании Спаса тридневнем и славнем видевше, глубину сия вся строившей Премудрости Божественныя и разума не всю испытали есте тогда, бездну же судеб Господних не у постигли есте, зане просвещени Духом не бысте. Но в волю Христа Господа себе предавше, видением Того распята не соблазнистеся, воскресению, достигосте, верно поклонистеся и научению Христову себе смиренно подклонисте; к послушанию веры и к разумению тайны любве Божественныя и нас, Апостоли Христовы приведите, да поем вам тако:

Радуйтеся, яко не смутися сердце ваше, еже веровати в Бога распинаема.

Радуйтеся, яко не в соблазн и не в безумие, но во спасение силою Божиею видение Креста Господня прияли есте.

Радуйтеся, не оставленнии сирыми по отшествии Владычнем.

Радуйтеся, рождие живоноснии лозы Христовой.

Радуйтеся, яко о вас молитва Христова пролияся, да соблюдени будете от неприязни и священни во истину евангельскаго слова.

Радуйтеся, Апостолов двоенадесятице, мира концы учением Христовым просветившии.

 

Кондак 9

Всю скорбь и печаль отъя Христос от сердец вас, другов Своих, многочастне и многообразне деньми четыредесятьми являяся вам по воскресении Своем, с вами же ядый и пияй, и всяко уверяя о Своем славнем востании, да будете свидетелие Ему даже до последних земли. Темже радостию несказанною исполнени бывше и тайнам Царствия Божия наученнии, союзом любве связуеми, единодушно бысте вкупе, глаголюще: Аллилуиа.

 

Икос 9

Витийства земнаго превышшее таинство восхода Господа на облацех на небо от горы Масличныя, Апостоли Христовы, зрети приведеннии, тамо многолюбезны дары научения последняго, яко от Владыки мира, от Христа получисте, премирное благословение от Него приясте, во Иерусалим возвратистеся с радостию велиею, выну благословяще Бога. Тако о вас благоволившему Промыслителю мира величия дающе хвалы, согласно приносим вам, воспевая сице:

Радуйтеся, мир от Господа, вседшаго на облаки небесныя, приявшии.

Радуйтеся, соединение горних с дольними в восходе Христове яве узревшии.

Радуйтеся, с собором безплотных Возносящася от земли на небо восхвалившии.

Радуйтеся, на горе восхождения Христова светообразному лица Его зраку последняя от земнородных боголепно поклонившиися.

Радуйтеся, имже заповедь научити языки слову Христову дадеся.

Радуйтеся, Апостолов двоенадесятице, мира концы учением Христовым просветившии.

 

Кондак 10

Спасения путь ища обрести ученический лик, Тебе видя от земли взимаема, глаголаше: «Владыко, како ныне оставляеши рабы Твоя и камо идеши, рукама содержай концы?» Егда же услышасте Спаса, глаголюща: «Не оставлю вас, яже собрах, но послю вам Духа Пресвятаго; вы же, с высоты оболкшеся силою, идите во вся языки, глаголя вещания спасения», тогда убо в радости снидосте с горы Елеонския, славя Божественное вознесение Христово, поя: Аллилуиа.

 

Икос 10

Стены дома, идеже с Богоматерию Апостоли святии беста, моляшеся о имени Христове, потрясеся свыше носиму дыханию бурну, егда в день Пятидесятный, исполняя преждереченная, посла Христос Духа Святаго, иже и сошед на вы видом огненным, ужасом исполнь языков собрание, языки бо глаголющих кийждо свою беседу слышаше. Темже мы, наследницы тоя благодати, вас зарею богоначальною облистанных, Апостоли богоноснии, славим:

Радуйтеся, яко по обетованию Христову яве крестистеся Духом Святым и огнем.

Радуйтеся, яко бысте жилище пречистей благодати.

Радуйтеся, яко в вас естеством святыни своея вселися с небесе сила Духа, от Отца исходяща и в Сыне почивающа.

Радуйтеся, во гласе дыхания Духом восхищеннии провещати величия Божия.

Радуйтеся, яко чрез ваша священныя главы огнь Утешителя Духа на землю сниде.

Радуйтеся, Апостолов двоенадесятице, мира концы учением Христовым просветившии.

 

Кондак 11

Пение благодарственное Святей и Живоначальней Троице в явлении Духа Святаго принесше, святии Апостоли, радости и всякаго ведения исполнистеся и дерзновение приясте, многими знаменьми и чудесы Церкве доброе начало положисте и велиею силою воздасте свидетельство воскресения Господа Иисуса, поя Богу: Аллилуиа.

 

Икос 11

Светоподательное проповедание ваше со смиренномудрием и многими слезами и напастьми исполняшеся; внимаху же народи глаголемым от вас единодушно, слышаще и видяще знамения от рук ваших бывающая, и крещахуся мнози. Вы же Церкви утверждасте, от места к месту преходяще, да и иным градовом благовестится слово Божие. Сего труда вашего ради взываем вам сице:

Радуйтеся, союзом любве Христовой связаннии, любовь и мир Церквам заветом вечным положившии.

Радуйтеся, ига, егоже немощно бе понести, на выи ученик никакоже возложити восхотевшии.

Радуйтеся, всем вся бывшии, да всяко спасутся нецыи.

Радуйтеся, посещати братию во всех градех, в нихже проповедасте Евангелие Христово, выну тщавшиися.

Радуйтеся, нощми и деньми люди паствы своея непрестанно учившии.

Радуйтеся, Апостолов двоенадесятице, мира концы учением Христовым просветившии.

 

Кондак 12

Благодати небесныя причастником и самовидцем Слова, еже по плоти Матере Его успение видети подобаше, еже на Ней таинство, яко не токмо Спасово от земли восхождение узрят, но и Рождшия Его преставление свидетельствуют. Темже, приспевшу дневи Богоматере отшествия, отвсюду Богоначальным мановением Апостоли собравшеся, Сиона достигше, и на небо предпослаша Вышшую Херувим, пение надгробное Пречистей творя богокрасною песнию: Аллилуиа.

 

Икос 12

Поюще дивная дела ваша, болезнем и трудом евангельскаго благовестия дивящеся, честная ваша страдания почитаем, богоизбраннии Апостоли: весь бо всюду мир проидосте, Евангелие Христово коленом всем, языком и странам проповедавше. Темже и мы славим вас вси:

Радуйтеся, мрежею словесною уловившии всякаго рода избранных.

Радуйтеся, ихже словом врата смерти отверзахуся и отдаяху затворенная мертвецы.

Радуйтеся, Кровию Агнца от людей первенцы Богу купленнии.

Радуйтеся, имже храм скинии свидения на небесех предуготовася.

Радуйтеся, Церкве Христовы великая славо.

Радуйтеся, Апостолов двоенадесятице, мира концы учением Христовым просветившии.

 

Кондак 13

О всехвальнии и богоблагословеннии Апостоли, Христом нареченнии Его друзи и служения Церкве наследницы, вышняго престола окрест обстоящии в неувядаемых венцех! Моление наше, любовию к вам ныне пролиянное, приемше, сотворите всех Богу молитву, да соблюдет Церковь Cвою святую в единомыслии и мире, пастырем ея дарует святыню имени Его ревностно исповедати и веры нелицемерней дерзновение показати, разсеянныя же ветром суемудрия чада да соберет во единое Царство, и да сподобит тамо во свете неприступнем с собором вашим Ему немолчно воспевати: Аллилуиа.

 

(Этот кондак читается трижды, затем икос 1 и кондак 1)

 

Молитва

О святии Апостоли Христовы Петре и Андрее, Иакове и Иоанне, Филиппе и Варфоломее, Фомо и Матфее, Иакове и Иудо, Симоне и Матфие! Услышите наши молитвы и воздыхания, сердцем сокрушенным ныне приносимыя, и помозите нам, вашим мощным пред Господем ходатайством, избавитися от всякаго зла и вражия лести, твердо же преданную вами веру Православную сохраняти, в нейже, вашим предстательством, ни ранами, ни прещением, ни мором, ни коим гневом от Создателя нашего умалени будем, но мирное зде поживем житие и сподобимся видети благая на земли живых, славяще Отца и Сына и Святаго Духа, Единаго в Троице славимаго и покланяемаго Бога, ныне и присно и во веки веков. Аминь.

Добавить комментарий

Ваш e-mail не будет опубликован. Обязательные поля помечены *